Chanmari FC aia lian Aizawl FC

GIG Motors MPL12-ah I League club pahnih an intawng a, Aizawl FC-in club hlun zawk danglamna nemnghetin Chanmari FC 3-1 in an hneh. Coach R. Lalruatfela hoten I Day Football semifinal-a an hneh loh Chanmarians lakah phuba an la a, table chungah berah awm chhunzawmin point thumin an sang fal ta bawk.

Aizawl FC tan Lalawmpuia Sailo, Zomuansanga leh Vincent Lalduhawma ten goal khat ṭheuh an khung a, Chanmari mualpho lutuk tur hliah khuh nan Laltluangliana'n siphurh a sut ṭhen. Hun tawp lam boruak a nung a, PC Rosangzuala'n AFC midfielder K. Vanlalhriatzuala a hliam a, Chanmari forward hi hnawhchhuah niin player 10 ve vein an khel tluan.

Cho leh cho

I Day Football semifinal-a an inhmachhawn ṭumin team pahnih an fimkhur a, MPL-ah erawh chak tumin bul an ṭan ve ve. Chanmariin bul an ṭan ṭha zawk a, KC Malsawmsanga'n chance ṭha insiamin goal-ah ṭha takin pet mah se Aizawl FC keeper Vanlalhriatpuia'n ṭha takin a dang.

Serchhip tlangval Lalruatsanga pawhin penalty area chhungah chance nei mah se goal zawnah a pet lo. Captain Lalrinchhana Tochhawng pawhin chance a hlah a, minute 15 chhungin chance ṭum thum an hlah hman.

Aizawl FC an insiam rem a, coach R-a'n inkhel a thlir uluk tih a chiang. Midfielder Om Oma hmangin inkhel an thunun a, vei lamah Sawma Tlangte awmin Zobawk tlangval hi a khel ṭha hle. Sawma Tlangte hian goal khung lo mah se Aizawl FC goal thum hi a siam vek a ni.

Minute 37-naah Sawma Tlangte-in Om Oma ke vei lama pet rem tur chiahin ball a pe a, Dinthar tlangval hian kawh zetin a pet lut. Chanmari midfielder Johny Lalremruata'n Om Oma a hnaih hman lo a, goalkeeper Zothanmawia'n a ven lamah a chhuah bawk.

Aizawl FC rilru a fim a, Chanmariin erawh an buai. AFC-in Sawma Tlangte hmangin an nawr let a, a ball pek ṭha chu Zomuansanga'n minute 45-naah a khung. Khawbel tlangval Zomuana'n tun inelnaah goal riat a khung tawh a, match li chhung a zawnin a khung tawh Chanmari lakah Aizawl FC dinhmun ṭhaah a dah.

AFC nge nge

Chanmariin siphurh sut tumin Aizawl FC player hlui C. Lalmuanpuia te luhtir nghal mah se R-a hote bawkin second half-ah bul an ṭan ṭha. Dinglam aṭang bawkin Aizawl FC-in an nawr a, Sawma Tlangtein vei lam aṭanga cross-in Zomuana'n pet fuh lo mah se Vincent-a'n ṭha takin minute 50-naah a khung.

Aizawl FC-in 3-0 hma an hruai hnuah pawh inkhel an thunun a, hliam chunga an khelhtir Om Oma la chhuakin K. Hriata an luhtir. Khawlailung tlangval K. Hriata'n training a la zawm tam tawk lo tih a lang a, tihsual a ngah. Chanmari lam an insiamrem hret hret a, chutihrualin Rohmingthanga awmna Aizawl FC tlarhnung erawh an ṭhiat thei meuh lo.

Minute 62-naah Chanmariin corner kick an hmang ṭangkai a, right back Laltluangliana'n a ke chhe lamin (vei lam) kawh zetin a pet goal. Chhinga hoten beiseina an rawn nei thar a, inkhel a nung chho hle.

Mahse, Aizawl FC-in ball chang tlem zawk mah se goal chance an ngah zawk. Vawi thum assist neitu Sawma Tlangte vanneih ṭum a ni lo a, a goal khung tur chu Chanmari defender Malsawmsanga Renthleiin a tauh chhuak hman a, hun tawp hma hreta a ball pet ṭha zet pawh keeper T. Mawia'n a dang bawk.

Hun tawp lam boruak a ṭang a, team pahnih coaching staff-te pawhin ṭawngkam an duh tui tawh lo. Injury time-ah PC-a'n K. Hriata a tlawh a, Chanmari forward hi hnawhchhuah niin Aizawl FC midfielder hi zawnchhuah a ni thung. Inkhelh zawhah erawh puitling takin AFC coach R-a'n Chanmari technical area lam panin Chhinga rawn pan ve bawkin an inchibai. An in chibai vang hian inkhela thil thleng erawh an theihnghilh dawn tihna a ni lo a, Lawngtlaia an inkhelh hunah inkhel a nung ṭha khawp ang.