Mizoram Premier League : Kim loin MLS-in Kanan an hneh

GIG Motors MPL12-ah MLS FC sawi bo an la rem lo, Lawngtlai club hian nimin khan player 10-a khel chungin Kanan FC 3-1 in an hneh. Vanlalpeka hoten hnehna an chan avangin relegation zone aṭangin semifinal khel thei chinah an invawrh chho a, Kanan erawh panganaah an tla thla thung. Lawngtlaia MPL khelh hunah MLS hian Kanan bawk hi an hmachhawn dawn a, nimina hnehna an chan avangin an muala inkhelh hun an nghakhlel khawp ang.

RG Stadium-a inkhelah MLS-in bul an ṭan ṭha a, minute ruknaah freekick hmuin Ricky H. Vanlalhriatsanga'n fing taka petin ven loa awm Ricky Zomuanzuala Khiangte a pe a, left back Zomuana hian goal kilah a hlai lut. Team ṭha zawka ngaih Kananin Lalthanpuia hmangin siphurh an sut a, minute 22-naah Tepuia hian box chhungah petna tur khawp insiamin goal kilah tak a pet lut.

Kanan hian player nei langsar zawk mah se khelmualah erawh MLS an khel ṭha zawk a, inkhela langsar ber Freddy Lalrinkima'n first half tawp hmain box pawnah chance insiamin goal kilah kawh zetin a pet a lut a, MLS-in 2-1 first half-ah hma an hruai.

Second half-ah goal mamawh Kanan an vannei a, MLS defender Zomuana'n fimkhur tawk loh vangin yellow card vawi hnihna hmuin hnawhchhuah a ni. Player 10-a an khelh hnuah pawh Lawngtlai club-in chance ṭha an la ngah zawk a; Ngurthanmawia'n cross bar a pet per a, Freddy leh M. Peka te goal khung tur Kanan keeper Maduha'n ṭha takin a dang.

Kananin chance insiam an harsat a, Tepuia cross chu substitute Lalthuthlunga'n goal-ah a chantir thei lo a; Tepuia'n MLS keeper Rosangliana tihsual a hmang ṭangkai thei lo. Minute 86-naah Freddy-a'n ṭha taka lalutin keeper Maduha a bum hnuah chak nemnghehna goal a khung. Injury time-ah substitute George Laltlanchhuaha Pautu-in hnai tak aṭangin a hlah a, Kanan mualphona a nep ta deuh. MLS-in chak an phu ang ngeiin 3-1 in an chak.