Team game kan khel lo - Ayush

AFC Under 23 Asian Cup 2026 Qualifier-a an match hnuhnung berah India chak mah se, Asian Cup khel turin an tling zo lo a, Blue Colts tana goal khungtu zinga mi Ayush Chhetri chuan, "Team game kan khel lo a ni," tiin Vanglaini a hrilh.

India hian an match tawp berah Brunei chu 6-0 in an sawp a, Vibin Mohanan chuan hattrick siamin, Mohammed Aimen chuan goal hnih a khung a, Ayush Chhetri chuan goal khat a thawh ve bawk.

Blue Colts hian point ruk an nei a, Qatar-in 2-1 a Bahrain an hneh avangin group hmahruaitu an ni thei lo. Pahnihna tiṭha pali zinga telin, India hian tlangna chance nei mah se, goal difference-ah United Arab Emirates phak loin an tlang ta lo.

Brunei hi India awmna, group H-ah 'point box' an ni a, goal 29 ngawt an chhuah. Qatar-in 13-0 in an sawp a, India hneh hnu Bahrain pawhin 10-0 ngawtin an sawp. India hian goal khung uar hret se, tlang thei tur an ni.

Ayush chuan, "Kan vanduai a tih loh theih loh a, chumi piah lamah chuan, team game kan khel lo kha kan tuar ta a ni. Kan tumpuite an ṭha lo tih kan hria a, mahnia tih goal vek kan tum a ni ber mai.

"A tawpah chuan mahni veka tih kan tum luat kan tuar ta a ni," a ti a, team anga an khel chhuak lo chu Asian Cup U23 an khelh phak loh chhan nia a hriat thu Vanglaini a hrilh.

India hian an match hmasa berah, rin loh takin Bahrain chu 2-0 in an hneh a, Qatar nen pawh intum tawk viau mah se, sawisel theih takin penalty an chawi a, 2-1 in an tlawm.

Match tawp berah Brunei sawp hrep an mamawh tih inhre chungin an inlan a, mahse, goal ruk chiah an khung avangin a vawi khat nana Asian Cup U23 khelh an beiseina chu a thamral.

India squad-ah hian Ayush bakah Chennaiyin midfielder Lalrinliana Hnamte (Terina) leh Bengaluru midfielder Lalremtluanga Fanai te chu an tel a, Brunei lakah Ayush leh Terina ten bul ṭanin, match hmasa pahniha khel tluan Tluangtea erawh bench lamah a awm thung.

Blue Colts player-te hi India lamah an lo kir leh tawh a, Ayush chuan FC Goa training a zawm nghal thu a sawi. Dinthar tlangval chuan, "Tunah chuan club training ka zawm leh tawh a, AFC Champions League Two khel turin kan inbuatsaih a ni," tiin Vanglaini a hrilh.

Super Cup champion Goa hian September 17, Nilaini zanah Iraq club Al Zawraa an mikhual ang. Goan club hi group D-ah awmin, Al Zawraa bakah Tajikistan club Istikol leh Saudi Pro League club, Cristiano Ronaldo khelhna Al Nassr te an awmpui.