SYS mangchhia belhchhah theitu Dinthar

GIG Motors MPL12-ah vawiin chhun dar 12:00 hian Dinthar FC leh SYS FC te an inkhel dawn. Maimawms hian semifinal beiseina sang tak an neih laiin Lunglei club erawhin chak an a nei lo a, table mawngphahah awmin tla thei dinhmunah an ding.

SYS hian Mizoram Police laka point khat an hmuh bak point an la hmu lo a, an kum a la naupan avangin MPL boruak sang an zo lo niin a lang. Chutihrualin SYS hi RG Stadium-ah an inkulh a, MPL khelhna hmunah training-na hun ṭha an nei thei a, round tinah hmasawnna hmuh tur a awm zel.

Mahse, SYS hian minute 90 chhung ṭan mar an la harsat a, team ṭha Dinthar lakah phei chuan tlarhnung tihphui lehzual a ṭul ang. Maimawms erawh an khelh tawh chin thlirin, semifinal beiseina an nei sang a nih pawhin thilmak a ni lo a, Laldampuia hote hian hnehna an chang a nih chuan an hmelma Chanmari nen an point hmuh zat a inang dawn.

Dinthar tan Jerry Lalchhanchhuaha a che ṭha a, MS Dawngliana pawh a ṭangkai ṭhin hle. Striker thar Lalkhawpuimawia'n bul a la ṭan lo a, Kelkang striker hian bul a ṭan loh pawhin SYS lakah minute a ngah hret turah a ngaih theih. Maimawms-in chak tumin game plan an siam dawn a, inhliam vanga goalkeeper Joel B. Lalramchhana khel lo tur erawh chânna lian tak a ni thung ang.