India-in UAE an sawp

Asia Cup-ah champion lai India-in a thlengtu UAE chungah zahngaihna an lantir lo a, wicket kuaa a chak bakah ball 93 an dah bang. Zanin dar 8:00 hian Pakistan leh Oman te an inkhel ang. Group A-ah India, Pakistan, UAE leh Oman te an awm a, group khat aṭangin team hnihin Super Four an lut dawn.

Dubai International Stadium-ah ṭhumvawra chak India-in vawm hmasak an thlang. UAE tan opener pahnih Alishan Sharafu (22) leh Muhammad Waseem (19) ten bul ṭan chhe lo mah se India bowler-te an chungnung chhunzawm. Opener pahnih tiam loa run siam tam ber Rahul Chopra-a'n run thu chauh a siam a, over 13.1-ah thi fai vekin 57 runs chauh an siam.

Indian bowler Kuldeep Yadav-a'n wicket li a la a, Shivam Dube-a'n wicket thum lain bowler chhuanvawr Jasprit Bumrah-a'n wicket khat chauh la mah se wicket hmasa ber a la thung. India tan target a hniam mah mah a, opener pahnih Abhisek Sharma leh Shubman Gill ten hun tam hman an tum lo.

Abhisek-a'n six vawi thum leh four vawi hnih a vaw hman a, 30 runs siamin 'out' mah se a thih chhan hi six vuak a tum lutuk vang a tih theih. Shubman Gill pawhin ball kua lekah 20 runs a siam a, captain Suryakumar Yadav pawhin a ball hmachhawn hmasak berah six vaw nghalin ball hnih hmachhawnin run sarih a siam ve bawk. India hian over 4.3 lekah 60 runs siamin hnehna an chang a; September 14, Pathianni zana Pakistan hmachhawn turin an inpeih.