Eriksen-a'n Wolfsburg a pan

Season hman zawh taka Manchester United chhuahsantu, Danish midfielder Christian Eriksen chuan Bundesliga club Wolfsburg a zawm a, June 2027 thleng khel turin contract a ziak.

Kum 33 mi Erkisen chuan, "Wolfsburg hi Bundesliga-a ka club hmasa ber a ni a, he chona thar hmachhawn tur hian ka phur tawh hle - thil ropui tak kan tihho theih ka beisei a ni," a ti.

Eriksen hian Ajax aṭanga a professional zinkawng zawh ṭanin, Tottenham Hotspur, Inter Milan, Brentford leh Manchester United tan a khel tawh a, Euro 2020-ah khan Denmark tana a khelh laiin lung lam harsatna avangin a lo tlu tawh.

Nipuia a chhuahsan tak United tan match 107 khel hmanin goal riat a khung a, assist vawi 19 a nei. United a chhuahsan hnuah Swedish club Malmo-ah training a nei a, tunah chuan Germany lam panin puanthuah a tel ta.

Eriksen chuan, "Wolfsburg manager Paul Simonis hian team tan mai bakah, keima mimal tan pawh thil thlir dan thui tak a nei a ni tih ka hrethiam nghal a, Danish national team-a ka khelhpui player an kawl nual bawk avangin Wolfsburg pan hi ka tan chuan a châkawm a ni," a ti.

Ajax leh Spurs tana a khelh laiin Eriksen hian a hming chher viau mah se, Inter Milan leh United-ah beisei a phak lo a, Red Devils tan hian FA Cup leh League Cup-ah chiah champion nomawi a chawi - Bundesliga-ah hming chher thar a beisei ang.