West Ham-ah Fabianski a kir

Polish goalkeeper Lukasz Fabianski-a'n thla hnih bak West Ham a chhuahsan hman lo - June thla khan a contract a zawh avangin Hammers hian an chhuahtir a, mahse, September a thlen meuh chuan an keeper hlui hi an la let leh!

Kum 40 mi Fabianski hian kum 2018 khan Swansea City aṭangin Hammers hi a zawm a, London club tan hian match 216 a khel hman. Mahse, season hmasa khan match 17 chauh khelin first choice a ni phak tawh lo.

Hammers-in an chhuah hnuah a kir leh a, tun season tawp thleng a khel ang. London club hian nipui transfer-ah khan Leicester City aṭangin goalkeeper Mads Hermansen chu pound maktaduai 20-in an la lut a, tun season-a league match thum an khelh tawhah bul a la ṭan vek.

French keeper Alphonse Areola an nei bawk a, ani hi League Cup-a Wolverhampton Wanderers an hneh loh ṭum khan a inlan thung. Third choice goalkeeper Wes Foderingham chuan Thawhlehni khan Cypriot club Aris Limassol a zawm a, hei vang hian Hammers hian Fabianski hi an ko kir a ni.

Arsenal keeper hlui Fabianski chuan, "West Ham hi ka tana club hlu tak a nih avangin ka lo kir thei hi ka lawm hle. Ka mimal duhna ai chuan club thil tum ka dah sang zawk fo ang.

"Mi ṭhenkhatin bula awm nuam leh team boruak tiṭhatuah min ngai ve a ni mai thei a, chutiang tak chuan team tana ṭha tur ka ngaihtuah zel ang," a ti a, tawnhriat a neih ṭhat avangin team tan a ṭangkai theih a beisei thu a sawi bawk.

West Ham manager Graham Potter chuan, "Lukasz kan nei let leh thei hi kan lawm hle. He club tana a lo khelh tawh vang ai mah chuan, keeper ṭha tak a la nih avangin kan mamawh hmun ruak a hnawh khat thei dawn a ni," tiin an keeper hlui an koh kir chhan a sawi.