Kumte chu number chauh alawm - Vardy

Serie A club Cremonese zawmtu Jamie Vardy chuan, "Kumte chu number chauh alawm," tiin Italian top flight league-ah a vul theih a beisei thu a sawi a, kum 38 mi ni tawh mah se, a theihna a la ngai reng niin a sawi.

Vardy chuan, "Min ring lo a ni mai thei a, chuvang tak chuan min rin lohna hi ka la chhanglet dawn a ni. Ka tan chuan kum hi chu number ve mai a ni a, tun hmaa ka tih theih ṭhin ka la tih theih chhung chu ka chawl lo ang," a ti.

English striker Vardy hian non-league club aṭanga a zinkawng zawh ṭanin, Leicester City a pan hnuah hming a chher a, 2015-16 season-a league nomawi an chawi khan goal 24 ngawt a khung.

Season hman zawh takah khan inelna hrang hrangah match 36 khelin goal 10 a khung a, Foxes-ah cham loin a chhuak. Club nei loin a awm reng a, September 1 khan Cremonese a zawm thu puan niin, kum khat atan contract a ziak.

Vardy chuan, "Tun dinhmunah chuan ka la in fit ṭhain, ka taksain chauh lam a la pan rih lo. Chuvang chuan ka inkhel zel dawn a, ka club thar tan ka theihna zawng zawng ka hlan ang.

"Italian ṭawng pawh ka zir dawn a, tunah erawh buaina a awm rih lo. Football hian 'ṭawng' hran a nei a, chu chu ball hmangin kan sawi mai ṭhin," a ti a, a la awm ngai lohna ramah khel mah se, harsatna a la nei lo.

Cremonese hian season hmasa khan Serie B khelin, playoff hmangin Serie A an inpetkai a, league match hnih an khelh tawhah rin loh taka la chak ve vein, AC Milan chu 2-1 a an hneh hnuah, 3-2 in Sassuolo an hneh leh tawh.

Vardy chuan, "Tuna kan tum ber chu league-a inhamtan a ni a, Leicester ka awm lai pawha kan tum ber a ni ṭhin. 'Tun season chu chumi khami chu kan ti ang' tiin Foxes-ah khan kan ti ngai lo. 'League-ah kan inhamtang tur a ni' tih a ni zel.

"Chu chu kan tum ber pawh a ni - a pawimawh ber chu kan khelh tur hmabak zel thlir a, theihna zawng zawng hlan a ni a, thil thleng tur chu tichuan a thleng mai ang," a ti a, club lian lo tana khelh chu a tawnhriat neih sa a nih thu a sawi.