Malacia hma hun la chiang lo

Manchester United coach Ruben Amorim-a duh loh zinga mi, 'bomb squad' an tih mai zingah Tyrell Malacia chu Old Trafford la chhuahsan lo awmchhun a ni a, he thu buatsaih a nih thleng hian a hma hun a la chiang lo.

Turkish club Eyupspor chuan Malacia hi an ngaihven a, mahse, Turkish club-ah pawh a lian lo pawl hi Dutch fullback hian a zawm duh ang em, tih chu zawhna awm mek a ni.

Ruben Amorim-a'n United player a duh loh ho, Antony, Alejandro Garnacho, Jadon Sancho, Marcus Rashford leh Tyrell Malacia te hian first team training pawh zawm loin a hranpain training an nei ṭhin a, player dang zawng hian club thar an nei tawh.

Kum 26 mi left back hian season hmasa chawhnu lam kha PSV Eindhoven-ah loan-in a khel a, United hi kum 2022 khan Feyenoord aṭangin a zawm - a season hmasa berah hian match 39 a khel.

Mahse, khup hliam vanga season khat tawp a chawlh hnuah United tan match riat chiah a la khel a, Turkish nipui transfer hi vawiinah a tawp tawh dawn avangin, he thuziak i chhiar meuh chuan Eyupspor a zawm leh zawm loh hi a chiang tawh hial ang.