Saikhamakawnin Police an sawp

GIG Motors MPL12-ah Saikhamakawnin an theihna tak tak an lantir ta a, nimin tlai khan Mizoram Police 4-0 in an sawp. Lalsangzuala Hmar hote hian a zawna match hnih chakin point riat hmuin palinaah an inhlangkai a, Police erawh relegation zone-ah an tla thla thung.

Saikhamakawnin ṭantu an nei ṭha a, player-ten chak tumin an khel bawk. Bethlehem Vengthlang tlangval Suanngaihmuana leh Marpara tlangval Lalnunzira Sailo ten goal hnih ve ve an khung a, Saikhamakawn tlangval Francis Malsawmkima'n goal khat a khung bawk.

Coach Sanga kaihhruai SKK-in chak an phu a, chutihrualin captain RS Lallawmzuala'n clean sheet theih nan save ṭha a nei nual. Saikhamakawn mipuiin inkhelh tawp rualin, "Saikhamakawn i te ber tawp lo e," tiin an zai rual a, I Day Football final-a an hneh loh Chanmari FC hmachhawn turin an inpeih. Police erawh inelna hnuhnung pahnihah final lut mah se tun ṭum inelnaah goal 16 an chhuah tawh a, ICU-ah dahluh an ngai leh ta.