Dintharin SYS lamah goal surtir

GIG Motors MPL12-ah Dinthar FC-in team ṭha an nihzia pholangin nimin chhun khan SYS FC 5-0 in an sawp. Maimawms tan theihna nei sang bik R. Laldanmawia'n goal hnih a khung a; MS Dawngliana, Tea Chinzah leh Lalrintluanga (Tutua) ten goal khat ṭheuh an khung.

Coach Laldampuia kaihhruai Dinthar hian an hmelma Chanmari nen point 13 ve ve an hmu a, an goal difference ṭha zawk mah se head to head vangin pathumnaah an lungawi a ṭul. Maimawms hian round 7-ah Aizawl FC an hmachhawn dawn a, hnehna an chang a nih chuan table hmahruaitu ni chungin phase 1 an khar thei ang.

Goal nga chu

SYS-in relegation zone chhuahsan duhin attacking football nen bul an ṭan a, mah se tlarhnung leh goalkeeper inkar zau tak chu an chak lohna lai a ni. Dintharin SYS chak lohna lai hmu fuhin dinglam aṭangin an nawr a, minute riatnaah Dinthar tlangval C. Lalnunthara cross chu Danmawia'n a khung.

Sialhawk Express hian goal hmaah player danglam bik a nihzia a pholang leh a, Tetea Sailo cross chu minute 18-naah Danmawia bawkin a khung. Maimawims-in an goal hnihna khung turin ball an inpe kual ṭha a, team goal dik tak a ni. Dinthar captain hi hattrick siam thei tur a ni a, SYS defender back pass sual a pet over bakah second half-ah goal ban a pet per bawk.

Dinthar hian second half-ah chance an ngah lehzual a, minute 65-naah Tea Chinzah-in vei lam aṭanga ṭha taka la tlangin, angle zim tak aṭangin a khung. Tetea Sailo-in goalkeeper chauh a hmachhawn hnuah pet goal lo mah se a ball pass ṭha bik chu minute 69-naah Dawngtea'n goal ruakah a khung. Goal ngana hi bench aṭanga rawn lut Tutua khung a ni a, Hnahthial tlangval hian dinglam aṭanga Vincent Laltluangzela cross ṭha zet chu minute 85-naah a tauh lut.

Lawm a kim lo

Dinthar goal ngain an chak a, coach Dampuia tan lawm a kim lo ang. Player pawimawh Jerry Lalchhanchhuaha chu hliam vangin first half-ah zawn chhuah a ni a, second half-ah Laldinsanga Thangluah chu hliam vang thoin an zawn chhuak.

Maimawmsah hian Mumbai City player hlui Rohlupuia Pachuau a inhliam tawh a, SYS an hmachhawn ṭum hian hliam vangin goalkeeper Joel B. Lalramchhana leh hrem vangin Lalhmangaihsanga a inlan lo bawk.

Dinthar hian goal nga an khung theihna inkhelah an tlarhnung a buai leh ṭhin a, second half-ah penalty chawiin goalkeeper Zosangliana'n SYS midfielder Stain Laltanfela penalty a dang. I League club Aizawl FC hneh tur chuan Dinthar hian tlarhnung an thuam ṭhat a pawimawh ang.