Arsenal hmatawng Gabriel Martinelli dinhmun

Premier League champion Liverpool lakah Arsenal an chak lo a, ram leh ram football inkhelh a awm zui avangin a hnuah Gunners hian match an la khel leh lo, tun kar tawpah erawh EPL an khel leh tawh dawn.

Anfield an tlawh ṭum khan Arsenal goal nawr danin sawisel a hlawh a, an hmatawng an hriam tawk lo - sawisel hlawh zinga hming langsar tak chu Gabriel Martinelli a ni a, a tan hmun a la awm zel dawn em, tih chu zawhna lian tak a tling.

Reds laka inkhel bul ṭantu a ni kha mi tam tak mah tih a tling a, mahse inkhel tura thlangtu Mikel Arteta chuan a chhan tlat thung - Brazilian winger hi a ring zui ang em, tih erawh sawi lawk a harsa tawh a, khawthlang chanchinbu mite titi tui a ni mek.

Martinelli kha an goal nawrna hmanrua a ni a, hmun ruak zauah chak taka a tlan theihna chu hman ṭangkai an tum a, striker Viktor Gyokeres chu Liverpool defender pawt khawmtu atan an hmang zawk a, an hlawhtling lo.

Mi tam tak chuan Martinelli hian inrintawkna a hloh a, ball a chanin a nghet tawk lo, tiin an sawi a - inringtawk lo tak chung chuang khelh fuh a harsa, player ṭha dang an awm ve tak avangin a tan hmun nghet chan a harsa dawn niin a lang.

A hnawng?

Player thawkrim tak a ni a, a tlan chak avangin fak a hlawh ṭhin - mahse, player dangte anga ball pass dik thiam leh mahnia insu kaw chawp thei ang kha a ni lem lo, hei vang hian a chanchin hian sawi zui a hlawh ṭhin.

Season hmasa khan inelna hrang hrangah match 51 khelin goal 10 a khung, a ṭhiante khung tur vawi ruk a siamsak bawk - EPL nomawi an chawi phak lo chiah a, Champions League-ah an hlawhtling zo ta lo bawk.

Nikum bikah kha chuan Real Madrid an hneh ṭuma a chet dan kha fak a hlawh lai ber a ni mai thei. Kum 2022-23 season kha chuan goal 15 a khung a, khatih hunlai kha chuan Arsenal goal nawr danah khan hmun ruak a tam zawk ṭhin.

Club tam takin Arsenal goal nawr dan an zirchiang a, ven dan an thiam tawh. Hetiang a nih avang hian Arteta-a'n an goal nawr dan a thlak hret hret, season hmasa anga set piece ngawta innghat anga lan kha a remchang tawh lo.

Hnai tê têa ball inpein, an khingpui defender ho bul hnaiah an awmchilh tam a, hmun awl a tlem ṭhin tawh hle. Hetiang inkhelah hian Martinelli tan chet a harsa, inhnaihchilha mi bum hi a chem kalna tak a ni lo, insiamrem thei tak ang maw!

Awm lo ta se

Arsenal hian nipui bazarah player thar lei nan pound maktaduai 300 deuhthaw an hmang a, man tam takin Noni Madueke leh Eze te an la lut, anni pahnih hi tlarhmaah chuan a sira hman kawp theih an ni.

English forward pahnih an awm belh bakah hian left winger atan Leandro Trossard chu hman theih turin a awm sa bawk - coach tan duhthlan tur an tam tak avangin khel ṭha lo chung chuan Martinelli tan hmun chan reng a harsain a rinawm.

Bukayo Saka a inhliam avangin Reds an hmachhawn ṭum khan Madueke chu right wing-ah tlantir a ni a, pre season an hman lai kha chuan left winger atan an hmang ṭhin, ṭha takin a khel kawp thei tihna a ni - tunah Eze an neih belh leh tawh bawk.

Arsenal tana a match hmasa berah Eze khan Martinelli hi a thlak a, mahse number 10 angin a khel ta zawk. Mikel Arteta hian season hmasa lama goal khung an harsatna kha sutkian tumin hma a la a, kawng hrang hrangin a khelh kualtir niin a lang.

Inrinni zan a lo ni ang a, coach hian Brazil tana feh chhuak Martinelli hi a ring nawn rih lo mai thei - bul ṭantu zingah a tel leh nghal a nih chuan mawhphurhna a nei sang dawn a, chet ṭhat loh a rem dawn lo, a tihsual zeuh chuan sawisel châktu a ngah lai tak a ni.

Contract thar

Manchester United leh Liverpool laka inkhel bul a ṭan avangin Arteta-a'n a ringtawk em em tih chu sawi nawn ngai loin a chiang. Tunah hian season hnih daih contract a nei mek a, kum 2028 thleng atan pawtsei turin an inbia niin an sawi.

Mahse, club chhung hrechiangtu pakhat, a hming tarlan loh chuan thlasik a ni emaw, nipui bazar emaw pawh ni se Arsenal hian player an hralh dawn a nih chuan Martinelli hi hralh theih langsar zinga mi niin a sawi thung a, a dik ngei pawh a rinawm.

Season thum liam ta kha chuan Premier League goal 15 a khung thei a, season khata a chet ṭhat ber ṭum leh a laka beisei an neih san lai ber a ni hial ang - tunah erawh hmasawn zawng ni loin, a hnungtawlh deuh niin a lang.

Thil chiang tak sawi theih erawh a la ni lo, rin dan huai taka sawi theih erawh chu Arsenal hi Gyokeres milin inherrem an tum phawt dawn niin a lang a, hemi tur hian Martinelli hi a insiamrem ve thei dawn em, tih chu hunin a la hril dawn a ni.

Kai Havertz leh Saka te an hliam mek a, tlarhma lamah nipui bazara lak thar hlirin bul ṭan vek tur erawh chuan rin ngam an la harsa ve thei bawk - Gabriel Jesus chu minute 90 khel tura a la inpeih chiah loh avangin Martinelli hi a fawng chelhtu a nih a ngaihna chen a awm.