USA-a Special Olympics-ah Mizo 7 tel dawn

16th July, 2015

Kumin July 23 aṭanga August 3 chhungin Los Angeles, USA-ah Special Olympics World Summer Games neih a ni dawn a, India ram aiawh tur zingah Mizoram aṭangin infiammi paruk leh coach pakhat an tel dawn.

Special Olympic Bharat (SOB), Mizoram hruaitute chuan nimin khan Aizawl Press Club-ah thuthar thehdarhtute an kâwm a, Special Olympics kalphung leh Mizo infiammite an tel theih dan an sawi. SOB hruaitu Zoliana Royte chuan, Special Olympics chu rilru lama rualbanlote pual a nih thu sawiin, "Ram hrang hranga infiammite an in el ṭhin a ni," a ti.

Zoliana Royte sawi danin, Special Olympic-a India ram aiawh tur hian state hrang hranga rilru lama rualbanlote intihsiakna an nei ṭhin a, chuta ti ṭhate chu thlan ṭhin an ni.

Rualbanlote bula khel turin rilru lama rualbanlohna nei lote pawh 'unified partner' atan thlan tel an ni ṭhin a; unified partner tur hian India ram hmun hrang hranga intihsiakna hmachhawnte aṭangin an thlang ṭhin. Unified partner tur hian Lalthansanga Fanai s/o Lianzuala, Chhinga Veng thlan a ni.

Special Olympic-a tel tur dangte chu - 11 a-side (football)-ah Alfred Lalchhanhima s/o R Zonunmawia, Lalmawizuala s/o Lalhmangaiha (L); 7 a-side (football)-ah Thanghmingliana s/o Vanlalrema (L), Lalfakzuala s/o Lalhmingthanga leh Lalthansanga Fanai s/o Lianzuala Fanai; athletics (100-200m)-ah Zohlupuii d/o Zothankima (L) te an ni. Lalthansanga tih loh hi chu Gilead Special School-a zirlai vek an ni.

Infiammite bakah hian Sarah Lalmuankimi chu India Basketball Female Team head coach turin a kal ang.

SOB hotute chuan, rilru lama rualbanlo infiamna thei tak tak 'disabilty certifcate' neih loh vanga inelna hmachhawn thei lo an awm ṭhin thu an sawi a, "Rilru lama rualbanlo neite chuan disability certifcate nei vek thei se a duhawm hle. An nu leh pate'n buaipuisak se, thil harsa a ni lo," an ti.

Zawhna chhangin SOB hotute chuan, Special Olympic-a medal dawngte chu state sorkarin lawmpuina pawisa a hlan ṭhin thu an sawi a, "Mizoram aṭanga chuan kan vawi khat telna a nih avangin lawmpuina pawisa chungchangah sawi a la awm lo," an ti a; medal dawng an awm chuan sorkarah incentive cash award an dilsak tur thu an sawi.