Chelh rual loh Liverpool an kal zel

Premier League-ah tuin nge Liverpool dang thei ang? tih zawhna chu chhan lohin a la leng vel reng a, a chhang thei reng reng an awm lo. 

Ningani zan khan Liverpool chuan 2-1 in Wolverhampton Wanderers an hneh a, Premier League table chung berah an awm chhunzawm zel. 

Liverpool tana captain Jordan Henderson goal khung chu Raul Jimenez chuan Wolves tan chhanglet mah se Roberto Firmino a lo lang ve leh a, Liverpool an chak. 

Reds hian tun season-a league match 23 an khelh tawhah tlawm an la nei lo a, anmahni hnaih bertu Manchester City aia match khata khel tlem chungin point 16-in an sang fal. 

Liverpool-in minute riatna lekah goal hmahruai an khung a, Trent Alexander-Arnold-a corner pet aṭanga ball kal chu Hendo chuan hmahruaina goal ni turin a tauh lut. 

Mahse, Wolves-in an mikhual hi Premier League hmahruaitu an ni tih an theihnghilh a, huaisen takin an bei let - minute 51-naah Adama Traore-a siamsak chu Jimenez chuan si phurh sut nan a khung. 

First half-a hliam vanga Sadio Mane chantu Liverpool an talbuai a, goalkeeper Alisson ni lo se Reds hi Wolves lakah tawlh­thlu thei an ni tih chiang takin a lang. 

Mahse, team ṭha bik leh rilru huaisen danglamna a lang a, point insem mai tura an lan hnuah Firmino chuan hun tawp nan minute ruk chauh a awm tawh tihah chakna goal a khung a, 2-1 in inkhel a tawp.

Tun hnai season thum chhunga Liverpool team hmuhnawm taka a phu ang tawka fak hlawh lo chu Jordan Henderson a ni. English midfielder hian Wolves lakah pawh a class a pholang a, a che vel a hmuhnawm takzet. 

Hendo hian goal hmahruai a khung bakah Firmino khung tur a assist a, Wolves-in awmze neia goal an nawr tur vawi tam dang chattu a ni a, tlarhma puih a ṭul hunah hmuh tur a awm reng bawk. 

Wolves an khelh ṭhat avangin Liverpool an hlauthawng a, mahse he boruak hi Hendo-a'n 'leadership' a neih ṭhatzia pholanna a ni - a naute a au phur reng a, team thahrui a ni. Reds manager Jurgen Klopp chuan, "A au satliah a ni lo a, awmze neiin tih tur a hrilh. Hendo hi nei lo ta ila, tuna kan dinhmun hi kan thleng kher lo ang," a ti. 

Ningani zan Premier League inkhel hi tun season-a Liverpool an hlauhthawn ber ṭum ni hialin a lang a, Reds hian Traore leh Jimenez an ngam lo ṭhin hle. 

Kum 28 mi Jimenez hi striker 'class' tia sawi ngam a ni a, Mexico tan match 81-a khelha goal 24 khung thei striker hian tun season-ah goal 20 a khung tling der ta. Premier League player zingah inelna hrang hranga tun season-a goal 20 khung tling thei hi Sergio Aguero (21) leh Raheem Sterling (20) an ni a, Jimenez a rawn lang ve leh ta. 

Wolves hian Manchester United leh Tottenham Hotspur point hmuh zat 34 an neih tawh avangin Champions League an mitthla ang tih a chiang a, top four tlin tum club tan ngaihthah chi an ni lo. 

Season duhawm tak hmangtu Mane a inhliam a, tun thlaa Reds zawmtu Takumi Minamino chuan Premier League-a a match hmasa ber a khelh a ṭul phah - Mane inhliam hi minute 33-na a ni. 

Klopp chuan, "Sadio khan a malpuiah hliam a nei a, eng ang chiah nge a nih kan la hre thei lo," a ti a, he thu buatsaih a nih thleng hian Senegalese forward dinhmun chiang taka sawi a la awm lo. Liverpool hian Pathianni zan dar 10:30-ah FA Cup fourth round match khel turin League One club Shrewsbury Town an lenchilh dawn a, January 29-ah West Ham lenchilhin February 1-ah Southampton an mikhual leh bawk ang. Klopp chuan, "Ni sarih chhungin match thum kan nei a, Sadio a awm loh bawk avangin a buaithlak hle. Ka tan chuan hei hi pressure chu a ni mai a, pressure dang ka nei ve lo," tiin a sawi.

Point eng zatin nge hma kan hruai fal ka hre lo. Ka ti tak tak - kar liam ta chhung khan ka lo theihnghilh hman a, midang ka zawt leh hial a ni. Ka naute hi mihring ve tho an nih avang­in a harsat chang a awm ve ṭhin. Wolves kha team ṭha tak an ni a, mahse a tawpna kan khar thei tih kan pholang. A pawimawh ber chu hnehna chan dan tur ngaihtuah kha a ni a, thutlukna siam thiam bik kan mamawh bawk - a tawpah chuan a chhanna chu Bobby bawk a ni. 

- Jurgen Klopp, Liverpool Manager