Van Persie-a'n United chungah thinrimna a nei lo

Dutch striker Robin van Persie-a'n Manchester United chhuahsanin Thawhlehni khan Turkish club Fenerbahce a zawm a, a club hlui chunga lungawi lohna a neih loh thu a sawi.

Kum 31-a upa Van Persie chuan, "Football-ah chuan tun ang hun thlen hun hi a awm a, thudik tak sawi chuan tun ang hun hi a thleng dawn tih ka hria," tiin Manchester United-in duh loh hun an neih tur thu a hriat lawk thu a sawi.

Dutch striker chuan sawi chhunzawm, "Istanbul ka rawn pan hma hian United player-te nen hun hlimawm tak kan hmang a, ka cham chhunga ka hnathawh min lawmpui a, chu chu ka tana pawimawh chu a ni. Fener ka zawm theih nan Ed Woodward-a'n (executive vice-chairman) hna ṭha tak a thawk a, puitling takin min dawr a ni. Ed, tuna ka thusawi hi i en a nih chuan ka lawm e" tiin a sawi.

Dutch striker Persie hi Fenerbahce-in an lawm luh ṭum hian mipui 10,000 zetin an lo lawm. Arsenal captain hlui chuan, "Thil pakhat ka tiam ang che u. Fenerbahce-in nomawi tam tak an chawi theih nan ka theihna zawng zawng ka chhuah ang," tiin a sawi.

Turkish club hian pound maktaduai 4.7-in Van Persie an la lut a, hemi hma hian United-a a teammate Nani chu pound maktaduai 4.25 in an la lut bawk.