I League khelhna tura khelmual buatsaih dan thlir

Nimin khan Sports Minister Zodin­tluanga office chamber-ah Aizawla I League khelh a nih theihna tur khelmuel chei dan turte sawiho a ni.

Lammuala I League khelh theih dan tur ruahmanna thlir a ni a, Rajiv Gandhi Stadium-a hnathawh mek chu vawiin hian enho nghal a ni bawk.

He inrawnkhawmnaah hian Mizo­ram State Sports Council hotute, Mizoram Football Association hruaitute leh I League khel tur Aizawl FC aiawhte an tel a; All India Football Federation-in I League khelh a nih theihna tura khelmual leh a chhehvela tehfung hrang hrang an zamte chu sawiho a ni a, he mi chungchang bawhzuitu tur bik committee an siam nghal.

Sports Minister chuan, "Mizoramah ngei I League khelh a ni tur hi a lawmawm a, hemi atana Aizawl FC an tling hi ka lawmpui hle a ni," a ti a, Mizoram Football Association hmalakna hrang hrangte fakawm a tih thu a sawi lang.

Aizawl FC president Pu Robert Romawia Royte chuan I League khel tura an inbuatsaih dante leh AIFF lamin Aizawl FC inrelbawlnate an endik tur thute a sawi a, Mizoram sorkar leh MFA lamin theihtawp chhuaha an phurpui chu lawmawm a tih thu a sawi bawk.

Sports Minister chuan Lammual thawm ṭhat ngai laite enfiah a, a khel­mual bik chei theih turte pawh a rang thei anga siam ṭhat a rawt a; Rajiv Gandhi Stadium lam pawh a ṭul thuta hman theih a nih leh nih loh enfiah a, an hnathawh kallai mekte a hmuna tlawh a rawt. Rajiv Gandhi Stadium hi vawiin chawhnu lamah Sports Minister, PWD Minister leh MFA President Lal Thanzara, MSSC, MFA leh Aizawl FC lamin an tlawh ang.

Nimin inhmuhkhawmnaah hian MFA lamin an hmachhawp hrang hrangte an sawi chhuak a, a bikin naupang zawkte'n football an zirna tura ruahmanna an neihte an sawi. Sports Minister chuan sorkar ruahmanna awm sate leh MFA programme-te chu a theih anga kal kawptir a rawt a; Sports and Youth Services department hnuaia football academy neihte pawh ṭangkai zawka hman ṭha a tih thu a sawi bawk.

I League khelh a nih theihna tur khelmual thawm ṭhat ngaite lo zir chiang tur committee ruatah hian Pu C Laltlanthanga, Secretary, MSSC chu chairman a ni a, Pu Lalnghinglova Hmar, Honorary Secretary, MFA chu secretary niin member-ah Aizawl FC aiawh, MFA aiawh bakah MSSC lam official-te an tel. He committee hian an thil zir chiante hi Sports Minister-ah an thlen ang a, chak taka hmalak zui tum a ni.

Chief Minister Lal Thanhawla chuan amah kawmtu AIFF official, MFA hruaitu leh Aizawl FC hruaitute hmaah Aizawlah ngei I League khelh a nih theihna turin a ṭul anga khelmual chei ṭhat a nih tur thu tun hnaiah a lo sawi tawh a ni.