Sanchez-a'n season bul ṭan dawn lo

Arsenal forward Alexis Sanchez chuan Copa America 2015 a khelh avangin August 8 aṭanga khelh ṭan tur Premier League bul a ṭan dawn lo.

Kum 26-a upa Chile forward hian June 11 - July 4 khan Copa America 2015-ah Chile a champion pui a, final-ah penalty shootout-ah chakna goal a khung.

A ṭhiante chawlh laia tournament hautak tak a khelh avangin Arsenal manager Arsene Wenger chuan chawlh pe rei deuh bikin August 3 thleng chawlh pek a ni. A player duhlai lakah Wenger a hmanhmawh lo a, a dawhthei hle.

Arsenal-in season thara an match hmasa ber August 9 a West Ham an hmachhawn hunah chuan a inlan dawn lo tih a chiang tawh. Amaherawhchu August 16 a Crystal Palace an hmachhawn hunah chuan inkhel thei tawh tura beisei a ni.

Season hmasa Premier League champion Chelsea leh FA Cup champion Arsenal ten August 3 a FA Community Shield an khelh hunah pawh Alexis hi a inlan dawn lo tihna a ni.

French manager Wenger chuan, "Alexis-a'n August 3-ah training a rawn zawm ang. Mahse minute 90 chhung inkhel tur chuan chawlhkar thum emaw vel tal chu a mamawh maithei. Kan game hmasa berah chuan kan chhawr theih a rinawm loh mah se a rang thei ang berin squad-ah a lo let ang," tiin a sawi.

Wenger-a thusawi anga chawlhkar thum vel training a mamawh dawn anih chuan Alexis hian Crystal Palace leh Liverpool a hmachhawn thei ngei dawn em tih ala chiang rih lo a ni.