English player to ber Sterling
Manchester City chuan Liverpool aṭangin winger Raheem Sterling an la lut ta a, a man atan hian pound maktaduai 49 an thehchhuak.
City hian pound maktaduai 44 an pe phawt anga, pound maktaduai li (4) dang hi Sterling-a chet ṭhat dan a zira pek leh tur a ni ang. English player zingah Sterling aia man to an la awm lo.
June thla khan City hian vawi hnih lai Liverpool hi an lo dawr tawh a, Reds pawisa phut zat an ken loh avangin an hlawhchham ve ve. Mahse amah Sterling-a berin Liverpool chhuahsan a duh avangin City an beidawng duh lo a, English rawlthar beiseiawm tak hi tunah chuan an ta a ni ta. Kum 20-a upa winger hian kum nga cham turin City-ah hian contract a ziak a ni.
Liverpool-a jersey number 31 ha ṭhin Sterling hian City-ah hian Liverpool pantu James Milner-a hak ṭhin jersey number 7 a ha ang.
Rawlthar hausa Sterling
Queen Park Rangers-a youth player a nih laiin Sterling hian kar khatah £400 a hlawh ṭhin a, Liverpool-ah kar khatah £35,000 hlawhin Manchester City-a a hlawh tur zat hi kar khatah £200,000 nia sawi a ni.
Liverpool-in to taka Sterling an hralh thei hi a chawrchhuahna QPR pawh an lawm khawp ang. Kum 2010-a £600,000-a Reds lama Sterling hralhtu Championship club hian Sterling man aṭang hian 20% an chang ve dawn a, chu chu pound maktaduai 10 bawr vel a ni.
Pellegrini a lawm
Sterling-a'n Etihad Stadium-a pan vanga lawm ber chu Manchester City boss Manuel Pellegrini a ni. Chilean manager chuan, "Khawvela attacking player ṭha ber pawl a ni a, player naupang tak nichunga theihna ngah tak a ni. City fan-te'n an team ṭan em em tana a khel hi hmuh an châk tawh takzetin ka ring a ni," a ti.
Hetihlai hian Liverpool lamah erawh Sterling hian huat a hlawh hle. Anfield chhuahsan a duh avangin Sterling hian Liverpool pre-season tour a tel loh a dil a, damloh chhuanlamin training ni hnih lai a kal lo bawk. Liverpool player ropui ṭhin Jamie Carragher leh Steven Gerrard te chuan Sterling-a chet dan hi zahpuiawm tiin an lo sawisel tawh a ni.
Beiseina thar nen Sterling
England international Sterling chuan, "A tawpa tawpah chuan engkim a fel ta. He club tana khelh hlan hi ka nghakhlel tawh takzet a ni," tiin City lam a zawm thei ta chu a lawm thu a sawi.
Sterling chuan hmasawn chhoh zel a inbeisei thu sawiin, "Player ṭha tak tak kianga i awm tam poh leh hmasawnna hun i ngah tihna a ni. He hmun ka pan theih vanga ka lawmna tizual em em tu chu World Class squad ka zawm thei hi a ni a, champion thei tur khawpa ṭha player he hmunah hi chuan an tam a ni," tiin a club hlui Liverpool a kap zauh.
Liverpool tan vawi 129 a inlana goal 23 khungtu Sterling chuan amah lo enkawl tawhtu coach te fakin, "Kum 15 mi lek ka nih laia Anfield lama min seng luttu Rafa Benitez chungah lawmthu ka sawi a, ka tan chuan kha transfer kha ka nun thlak danglamtu leh chona thar min petu a ni. Kum naupang te nichunga Liverpool tana khelhna hun min petu leh min ringtu Kenny Dalglish chungah lawmthu ka sawi bawk," tiin Liverpool-a a hun hmasa lama amah puitu coach te hnenah lawmthu a sawi.
English winger chuan amah chher liantu ber Rodgers fak chhunzawmin, "First team tana khel thei tura hun ṭha min petu Rodgers-a chungah lawmthu ka sawi a, regular taka khel chunga khawvel hmaa ka thiamna pholanna hun ṭha min pek avang khan ka lawm takzet a ni," a ti.