Wimbledon Championship 2015 a herliam ta
Kum 1877 aṭanga khelh ṭan tawh, khawvela tennis tournament upa ber Wimbledon Championship 2015 chu June 29 aṭanga July 12 inkar khan London-a All England Club-ah khelh a ni.
He championship-ah hian inelna category 12 awmin mipa single-ah world number 1 Novak Djokovic a champion a; hmeichhe single-ah world number 1 Serena Williams a champion bawk. Kumina thil thleng zingah theihnghilh tawh ngai lo tur langsar tak tak a awm nual.
Ram leilung fa
Infiammi an ngaihsanna hmun England-ah fan-ten khawtual player ṭan tur an duh ṭhin. Wimbledon-ah kum 77 chhung zet an nghah hnuah kum 2013 khan Murray chu champion-in an duh an nghak chhuak. Kuminah Murray lakah beiseina sang tak nei leh mah se semifinal-ah Roger Federer hneh loin a tla.
Mipa double-ah Jamie Murray leh John Peers te inkawp chu Jean-Julien Rojer leh Horia Tecau te ṭang dun lakah tlawmin English mipuiin kuminah an beisei an hmu lo. Hmeichhe lama an chhuanvawr Britain number 1 Heather Watson chu Serena Williams hneh loin third round-ah a tla bawk.
Centre Court-a Watson leh Williams inkhelh ṭum hian British fans an pungkhawm hnemin an bengchheng hle a; wimbledon history-a fans bengchhen ber ṭum an ti hial.
Player langsar ten beisei an phak loh laiin khawtual nula Yui Kamiji leh Jordanne Whiley te chu hmeichhe wheelchair doubles-ah an champion. Anni pahnih hian tun hnai Grand Slam tournament pasarih aṭangin vawi ruk ngawt an champion a ni.
Hingis a lo kir
Kum 1997 khan Martina Hingis chu Wimbledon-ah hmeichhe single-ah a lo champion tawh a, a ke hliam vanga tennis chawlhsan zuiin kum 1998 kha a inlan hnuhnun ber ṭuma ngaih a ni. Hemi kum hian double-ah an champion nghe nghe.
Swiss star hi kuminah lo kir lehin beisei phak bakin Hingis hi a rawn che ṭha a, hmeichhe double-ah Indian Sania Mirza nen ṭangkawpin an champion a, mixed double-ah Indian tho Leander Paes nen an champion bawk.
Beisei phak lo Nadal
Grand Slam vawi 14 champion tawh kum 29-a upa Rafael Nadal chu second round-ah world number 102-na Dustin Brown hneh loin a tla.
Wimbledon vawi hnih champion tawh Nadal hi tun hnai kum li chhungin quarterfinal a inhlangkai miah lo a, a hneh lohte hi world number 100 hnuai lam vek an ni nghe nghe.
Mipui ngainat Federer
Wimbledon 2015 final-ah vanduai mah se inkhel entu tam zawk thinglungah chuan kum 33-a upa Roger Federer chu 'Darling of the Centre Court' a ni tho.
A mize zawi leh dangdai tak avangin Roger hian mipui ngainat a hlawh a; British fachuam Murray hnehtu ni mah se English mipui ten an haw phal lo. Ani hi nakkumah hmuh leh ngei an duh thu an sawi uar hle.
Inringtawk lo Maria
Kum 2004 champion Maria Sharapova chu semifinal-ah Serena Williams hneh loin a tla; William lakah a zawnin 17 zet a tlawm ta. Kuminah hian Russian nula hian a service a humhim lo hle a, vawi 44 zet double fault neiin tun tournament-ah ani aia double fault nei hnem an awm lo.
Ace leh Rally
Tennis-ah chuan 'game play' thiam a pawimawh rualin service neih ṭhat a pawimawh hle. Tun tournamnet bikah match li a khelh aṭangin Croatian tennis star Ivo Karlovic chuan vawi 165 zet 'ace' siamin, kumin bikah a siam hnem ber.
Mipa champion Djokovic chuan match sarih a khelh aṭangin vawi 77 siamin ace siam tam lamah pa kuaana a ni. Final-a a bitum Federer chuan vawi 81 siamin Novak chung chiahah a awm bawk.
Tisual loa ball an in pek kual tawn zat hi chhinchiah vek niin ball in pe kual rei ber (Longest rally) chu Gael Monfils leh Gilles Simon niin third round-ah vawi 34 zet an inpe kual a ni.