Sawiselna hi chak nan ka hmang ang - Giroud

Arsenal goal khungtu ropui ni ṭhin Thierry Henry chuan tuna Arsenal striker rinrawl Olivier Giroud chu Premier League-a champion pui tham ni loa a hriat thu leh Champion tur chuan Emirates Stadium-ah striker thar lakluh a ṭul thu a lo sawi tawh.

Mahse a hnampui Giroud chuan he sawiselna hi a huat loh thu leh season tharah chuan goal tam zawk khung a tum tur thu a sawi.

Season hmasa khan manager Arsene Wen­ger-a striker rinrawl ni chungin Giroud hian Premier League-ah goal 14 a khung. Forward dang Alexis Sanchez (16), Danny Welbeck (4) leh Theo Walcott (5) te goal khung zat en chuan attacking game khel ṭhin Gunner tan chuan an tlarhma te hi an duhkhawpawm lo hlein a rinawm.

Kum 28-a upa French striker chuan, "Mihring kan nih avangin sawiselna leh fakna chu kan dawng tur a ni ang; kei chuan hei hi a ṭha zawnga hman ka duh. Season tharah chuan goal tam zawk khung ngei ka duhin ka tum dawn a, kung zat tur erawh sawi lawk theih a ni lo. Mahse a tlem berah goal 20 tal khung ka duh a, hmasawn zel tur ka ni," tiin a sawi.

Kum 2012 khan Giroud hian Montpellier aṭangin Emirates Stadium hi a pan a, match 105 khel tawhin goal 58 a khung tawh a ni.