McLaren-in hmasawn inring

Formula 1 team hlun leh ṭha ber pawl ni ṭhin McLaren chuan Hungarian Grand Prix aṭang chuan hmasawn ngei an tum.

Kum 1966 aṭang Formula 1 intlansiak team a lo tel tawh McLaren hi vawi riat Con­structor champion­ship-ah pakhat­na an lo ni tawh; mah se kuminah beisei an pha loin Fernando Alonso chuan point khat chauh a la hlawhchhuah bakah a team-mateJenson Button chuan point li chauh ala hlawhchhuak bawk.

McLaren hian an Car Chassis-ah MP4-30 hmangin Honda RA615H chu an engine hman lai ni bawkin Pirelli tyre an hmang thung. Tun season-ah intlansiak vawi kua an hmachhawn tawh aṭangin McLaren hian point nga chauh hmuin hmahruaitu Mercedes chu point 181 teh meuhin an phak lo tawh.

Racing director Eric Boullier chuan, "Tunah hian kan car hi duhthu a sam lo hle tih chu kan hria, mahse kan harsatna pakhat chu tun hnai mai khan kan sukiang ta. Kan engine hman Honda RA615 a hybrid system chu kan siamṭha tawh a; hei hian nasa takin kan car a ti tlan chak ngeiin a rinawm," tiin a sawi.

Boullier chuan sawi chhunzawmin, "Kan dinhmun kan inenin team dang a bik takin Mercedes leh Ferrari te kan el pha lo hle. Hei tluka hrehawm hi kan tan chuan a awm chuang lo a, chuvangin a sut kianna kan ngaihtuah char char a ni. Tunah chuan kan harsatna zawng zawng la fel vek lo mah se kawng khat chuan hma kan sawn ngei ang," tiin a sawi bawk.