IPL engtinnge a kal zel dawn?
Supreme Court-in Chennai Super Kings leh Rajasthan Royals te Indian Super League aṭangin kum hnih chhung atan a suspend a, buai phahna tur awm bawk mah se IPL tan tlakchhiatna tham a ni lo.
Twenty20 cricket tournament ngaihhlut IPL hlutna hi cheng tluklehdingawn li vel anga chhut a ni. Sum chevel a tam avangin IPL hotute duh ber chu mipui ngaihven a ni a, a ṭha lo lam pawha mipui hriat hi IPL tan hlawkna a ni.
Thil siam leh zawrh chhuah lama mithiam bik Harish Bijoor chuan, "Hlawkna ang zawka kan thlir a nih chuan IPL hlutna hi cheng tluklehdingawn li vel a ni a, tuna a lar hluaina hi tluklehdingawn khat hu vel a ni. IPL hi ka chhut dan ang a nih chuan sawisel dawl zo a ni a, tuna harsatna a neih pawh hi a hlawkpui ang," tiin a sawi.
Pawisa inchawina lama IPL hming hliauna hi sawi bawk mah se ticket hralh leh TV entu lam an pung zel tlat. Kum 2008-2014 chhungin cricket kalphung hlun zawk 'Test Cricket' leh 'ODI' te inkhel entu chu 40% laiin tlahniam mah se Twenty20 inelna IPL erawh nikum chhung khan 20% in a pung thung.
IPL official partner zinga mi Yes Bank Chief marketing officer Anindya Datta chuan, "IPL hlutna hi a san zel avansgin sports event pawimawh tak a ni. Inkaihruaihna nghet zawk an duang chho zel ang a, chu chuan IPL hmel a ti mawi zel ang. Chu chuan IPL club sponsor-tute tan hlawkna tam zawk a siam dawn a ni," tiin a sawi ve bawk.
Duhtu an tam
Chennai Super Kings leh Rajasthan Royals te kum hnih chhung an hrem chuan BCCI-in a thlakna tur club thar pahnih an ngaihtuah a ṭul dawn.
IPL club nei duh khawpui pasarih an awm der tawh, chungte chu Pune, Kochi (Khawpui pahnih hian tun hmain IPL team an lo nei tawh), Ahmedabad, Indore, Raipur, Ranchi leh Kanpur te an ni.
Sum lamah pawh harsatna a awm chuang lo. IPL club nei duh mihausa an awm nual. Sumdawng hausa JSW Steel chairman Sajjan Jindal te, khawvela kahpathir (steel) siamchhuaktu company lian ber Arcelor Mittal CEO Lakshmi Niwas Mittal te, Adani Group founder leh chairman Gautam Adani te, Videocon group neitu Venugopal Dhoot, RPG group chairman Harsh Goenka te, PVP cinema neitu Prasad Potluri te leh Hero Group neitu zinga mi Ajay Gupta te chuan IPL club neih an hreh lo.
Venugopal Dhoot chuan, "Videocon tih lar nan hian nuai 100 chuang kan hmang a, IPL club neih chu tihlarna ṭha a ni," tiin IPL club neih chu company tana a ṭhat thu a sawi.