Santiago Bernabeu-ah Casillas-a hun a tawp ta

Kum kaw mi lek a nih laia Real Madrid zawmtu keeper ropui Iker Casillas chuan kum 34-a upa nichungin a hmangaih Real Madrid a mangṭha a; Santiago Bernabeu-a a press con­­ference hnuhnung berah Spain captain insum zo loin a mittui a tla.

Real Madrid player a nihna anga a press conference hnuhnung berah Casillas chuan, "Tunah chuan Real Madrid player ka ni tawh dawn lo a, Porto player ka ni ta. Kum 18 leka upa nichunga Real tana ka khelh ṭan aṭanga min ṭawiawmtute zawng zawng chungah lawmthu ka sawi. Kum nga chhung khawvela club ropui ber pawl captain ni thei turin min pui a, trophy ropui tak tak ka chawi theihna turin in kut in rawn pharchhuak a, ka chunga in ṭhatna zawng zawng hi ka theihnghilh tawh ngai lo ang," tiin Real fan-te a thlah.

A vanglai hun zawng zawng Real tana pe zotu Iker hi a huntawp lamah Real-in an chawimawi tawk lo. Jose Mourinho-a'n thlak theih loh hiala an ngaih keeper hi bench-a a ṭhuttir fo hnuah ngai a awh leh tawh lo a, tunah chuan Potuguese club FC Porto keeper a ni dawn ta.

Record ropui

Casillas hian kum 18 leh ni 115 leka upa nichungin September 12, 1999 khan Real tana a game hmasa ber a khel a, Spanish club ropui tana keeper inlan thei naupang ber a ni. Real tana a game hmasa ber a khelh hnuin Iker a hawi kir tawh lo. Khawvela an player duhzawng apiang lei mai ṭhin Real tan match 725 zet a khel a, La Liga-ah ringawt pawh vawi nga champion puiin Champions League nomawi vawi thum a chawi pui bawk.

Kum 16 Real tana a khelh chhung­in vawi 17 zet penalty a dang a, team 94 lai hmachhawn hmanin tournament lianthamah final vawi 11 khelin vawi 9 chu a chak zawk an ni.

Perez vangin maw?

Kum 2010 World Cup-a Spain champion puitu Casillas-a'n Real Madrid a chhuahsan chhana kawh rawn hlawh ber chu Real president Florentino Perez-a ni.

Casillas-a nu leh pa phei chuan an fapa chuan a phu tawk anga ngaihsakna leh zahna Santiago Bernabeu-ah a hlawh chhuak tawk lo nia ngaiin na takin Perez hi an dem a, a player lakluh a nih loh vangin Perez chuan an fapa chu chhuahtir dan mawlh a ngaihtuah niin an sawi nghe nghe.

Mahse, Perez-a thu leh hla erawh a dang thung. Real Madrid president chuan, "Iker hi kan hnena kum 25-a cham chhungin kan zahna leh amah kan ngainatnate hlawhchhuak turin a thawkrim em em a, tehkhin rual loh khawpa player ropui a ni. Real Madrid leh Spanish football chanchina goalkeeper ropui ber chuan min chhuahsan dawn ta," a ti.

Perez chuan amah vanga Casi­llas chhuak tur anga an sawina chu phain, "Real Madrid-a tumah hian Iker hi chhuak turin kan ti lo. Chona thar hmachhawn tura chhuah a duh vangin chhuah kan phalsak a, kei chuan Real-ah ngei hian football chawlhsan se ka duh ber a ni," tiin an keeper ropui thlahna match buatsaih tura hma an lak mek thu a sawi bawk.

Mangṭha Casillas

Khawvela player man to ber Gareth Bale chuan, "Kum hnih chhung Real tana kan khel dun thei kha ka tan chuan chawimawina ropui tak a ni. He game ropui tak chawi­mawitu ka ṭhian duhsakna tinreng ka hlan a che," tiin Casillas a thlah.

Real hmelma kumhlun Barcelona legend Xavi meuh pawh a ṭawng­chhuak a, season thar aṭanga Qatar club Al-Sadd tana khel tur Spanish midfielder chuan, "Iker hi ka player ngainat leh ṭhian ṭha tak a ni a, player fiamthu duh leh kawm nuam engtiklai pawha chak duhna thinlung pu mi a ni," tiin Spain tana a khelhpui ṭhin keeper chu a fak.

Casillas nena kum sawm lai lo khel dun tawh Sergio Ramos chuan, "Kum sawm chhung hun hmang dunin thil tam tak kan tawng a, ka tan chuan Captain ropui tak i ni. Duhsakna ka hlan che," tiin Real leh Spain tana a khelhpui ṭhin player chu a thlah.

Kum li chhung Real-a Casillas nen lo khel dun tawh Beckham pawh a ṭawngchhuak a, England captain hlui chuan, "He pa chungchang hi engtinnge kan sawi belh chuang ang? Iker-a'n a club hmangaih em em leh a theihna zawng zawng a lo pek ṭhin a chhuahsan tur hmuh hi a hrehawm a, ka tan chuan ṭhian danglam bik leh khawvelin keeper a hmuh tawh zinga ṭha ber pawl a ni e," tiin a thlah ve bawk.