Djokovic a la ṭha dawn chauh - John McEnroe
World number 1 hlui John McEnroe chuan Wimbledon champion thar Novak Djokovic chu a la ṭhat dawn chauh thu leh, tun hnai kum hnih chhungin Grand Slam vawi li emaw vawi nga emaw a champion theih a rin thu a sawi.
United States hranghlui McEnroe hian a vanglaiin Wimbledon vawi thum a champion bakah US Open-ah vawi li a champion bawk. Kum 1980 khan a tawnsan lai ber tawngin world number 1 a ni nghe nghe.
Pathianni khan kum 28-a upa Djokovic hian Roger Federer hnehin a vawi thum nan Wimbledon champion nomawi a chawi. Grand Slam pali aṭangin French Open tih lohah chuan champion kim vek tawhin a vaiin Grand Slam-ah vawi kua (9) a champion tawh.
Kuminah Djokovic hi a khel ṭha tluang hle a, chawlhkar 53 chhung world number 1 a ni mek. Grand Slam tournament pathum an khelh tawh aṭangin Australian Open leh Wimbledon-ah champion-in French Open final-ah erawh Stan Wawrinka a hneh lo thung.
Kum 56-a upa McEnroe chuan, "Tun dinhmunah chuan Novak hian a vanglai a hmang mek a, a hrisel ṭha a nih phawt chuan kum hnih kum thum lo kal leh tur mipa tennis hi chu a thunun thei ang. A inkhel kan en chuan tih tak takna leh huaisenna kan hmu tel a ni," a ti.
Kum 2003 aṭanga tennis professional huanga rawn zuang lut Serbia Djokovic hi che ṭha viau mah se a chet ṭhat ber ṭum erawh a ni lo. Kum 2011 khan Australian Open, Wimbledon leh US Open te a lo chawi tawh. Kuminah he a record hi tluk turin US Open ala hmabak.
Tennis a khelh chhunga champion nomawi 77 zet chawitu McEnroe chuan, "Khawvelah hian mi bik an lo piang chhuak ṭhin. Mipa tennis-ah pawh hian mi bik an awm nuala chungte chu Rod Laver, Pete Sampras, Roger leh Rafael Nadal te an ni. A pangana chu Novak hi a ni tawh; ani hian hmalam a pan mek bawk," tiin Dokovic a dah sang hle.