Chelsea number 9 thar Falcao
Manchester United-a a hlawhchham hnuin Colombian striker Radamel Falcao-a'n loan bawkin Premier League champion Chelsea a zawm a, a jersey number tur chu 9 a ni.
Season hmasa Premier League-a hlawhchham Falcao hian United tan vawi 26 league game a khelhah goal li chiah a khung a, Chelsea jersey number zinga luck lohna number ang hiala an ngaih number 9 ha chung hian a hlawhtling thei ang em?
Falcao hma hian kum 2000 hnua Chelsea player zingah Jimmy Floyd Hasselbaink, Mateja Kezman, Hernan Crespo, Khalid Boulahrouz, Steve Sidwell, Franco Di Santo leh Fernando Torres te'n number 9 hi an lo ha tawh a, heng player beiseiawm leh langsar tak tak zingah hian Hasselbaink chiah hian Chelsea number 9 hi a hlawhtlinpui tiin a sawi theih.
Kum 2000 hnulama
Chelsea number 9 te
Jimmy Floyd Hasselbaink
(2000-04, £15m)
Kum 2000 hnua Chelsea number 9 zingah Dutch striker Hasselbaink tluka hlawhtling an awm kher lo ang. A hunlaia Chelsea player man to ber hi Eidur Gudjohnsen nen tlar hma lamah inkawpin an inkawp fuh hle a, Blues tana a season hmasa berah hian goal 23 khungin Premier League top scorer a ni nghe nghe.
Hasselbaink hian Chelsea tan vawi 177 a inlanah goal 88 a khung a, Roman Abramovich-a hnuaiah Chelsea-ah hian season khat hun hmangin goal 18 a khung a ni.
Mateja Kezman (2004-05, £5.3m)
Kum 2004-ah Chelsea-in manager thar atan Jose Mourinho an la lut a, Portuguese coach hian PSV Eindhoven tan vawi 176 a inlana goal 129 khungtu Kezman a la lut.
Mahse, Serbia and Montenegro international hian Dutch club lama a ropuina Stamford Bridge-ah a chhawm thei lo a, vawi 41 a inlanah goal 7 chiah a khung.
Hernan Crespo (2005-06, £16.8m)
Kum 2003-ah a hunlaia khawvel striker ṭha ber pawl Crespo-a'n Chelsea a pan a, a season hmasa berah hian number 21 hain Chelsea tan vawi 31 a inlanah goal 12 a khung. Kum 2004-05 season AC Milan lamah loan-in a hun a hmang a, kum 2005-06 season-ah Chelsea lamah kir lehin number 9 a ha.
Chelsea jersey number 9 ha chungin Crespo-a che hleithei lo a, vawi 42 a inlanah Blues tan goal 13 chiah a khung.
Khalid Boulahrouz (2006-07, £8.5m)
A rorum em vanga 'The Cannibal' hming an phuahsak Dutch defender Khalid Boulahrouz-a'n Chelsea a pan a, defender nichung sia Chelsea-in number 9 an haktir hi a mak hrim hrim.
Premier League-a a game ṭan tir lamah khel ṭha viau mah se hliamin a tihbuai hnuin ngai a awh leh tawh lo. Season khat chiah Chelsea-ah hun hmangin Blues tan vawi 20 a inlana, goal a khung lo.
Steve Sidwell (2007-08, free transfer)
Reading midfielder hian beiseina sang tak nen Chelsea a zawm a, mahse English midfielder hi Chelsea tan a ṭha tawk lo. Season khat chiah Blues tan hian a khel a, vawi 25 inlanah goal khat chiah khungin a kum lehah Aston Villa a zawm.
Franco Di Santo (2008-09, £3.4m)
Argentine striker beiseiawm tak ni ṭhin Franco Di Santo hian kum naupangte nichungin kum 2008-ah beiseina sang tak nen Chelsea a zawm a, London club tan hian reserve team-ah khel ṭha viau mah se first team-a a luh hnuin beisei a phak lo a, Blues tan vawi 16 a inlanah goal khung miahloin Stamford Bridge-ah hun a hmangral.
Fernando Torres (2011-14, £50m)
Liverpool striker ropui an sawi apianga sawi hmaih ngai tawh loh tur Torres hian Anfield-a a hlawhtlinna Stamford Bridge-ah a chhawm thei lo. Player hlawh hnem leh man to nichungin vawi 172 Chelsea tan a khel a, goal 45 chiah a khung thei.