Tour de France 2015 Cancer vangin Basso a inhnukdawk
Italian rider Ivan Basso chu Tour de France 2015 neih mek aṭangin tilmu cancer a nei tih hriat chhuah a nih avangin a inhnukdawk.
Giro d'Italia (Tour of Italy) champion hlui Basso chuan, "Darkar hnih kalta khan cancer ka nei tih kan hrechhuak a, ka chawlh a ṭul a ni," tiin Thawhṭanni press conference-ah a sawi.
Basso hi Tinkoff-Saxo team-ah Spanish rider Alberto Contador te nen an awm ho a, Tour de France neih mekah kar hnih chhung tlanga an tlan dawn avangin Contador hian Basso awm lo tur hi a ui hle. Press conference neihnaah pawh hian Contador hi Basso bulah a ṭhu a, Italian rider chawlh tur thu a puan lai hian a mittui a tla hial.
Tour de France hi thirsakawr hmanga intlansiakna hautak zet mai a ni a, inelna hian thla khat dawn lai awhin 3,358.3 km zet an tlan ṭhin. Kumin inelna hi July 4 khan Utrecht, Netherlands aṭangin an ṭan a, hemi hnu hian Belgium tlawh lehin sana vir dan loh zawngin France ram an hel a, July 26 khian Paris-ah a tawp ang.
Thirsakawr intlansiakah hian mimal ṭhat ringawt a tawk lo a, infiamna dang ang thoin team anga thawhhona a pawimawh hle. Mimal anga thli na tak patlang tur chuan tha a heh a, a ruala tlan chuan rider ṭha ber kha midang hnungah awmin tha a khek thei thung.
Cyclist ropui Lance Amstrong chuan tilmu cancer hi a lo ngam tawh a, American rider chuan Basso hi duhsakna a hlan. Amstrong hian 1999 leh 2005 inkar khan Tour de France hi vawi sarih zet a lo champion tawh a, amaherawhchu damdawi hman phal loh a hman avangin a title lakte hi kum 2012 khan hlih sak a ni.