Indian Premier League Kum hnih atan Super Kings leh Royals te an hrem

Justice RM Lodha kaihruai Supreme Court committee chuan Thawhlehni khan Indian Premier League club Chennai Super Kings leh Rajasthan Royals chu dan phal loh pawisa inchawia an hruaitute an inhnamhnawih avangin a hrem.

Super Kings team principal Gurunath Meiyappan leh Royals neitu zinga mi Raj Kundra te chu an damchhunga cricket-a inhnamhnawih thei lo turin an hrem bawk.

IPL 2013 corruption scandal

Kum hnih liamta khan Delhi Police te chuan cricketer lar Sreesanth bakah Ajit Chandila leh Ankeet Chavan te chu 'spot fixing' vangin an man a, an pathum hian Rajasthan Royals player an ni.

Spot fixing leh match fixing hi a inang lo. Match fixing-ah chuan infiamna dan bawhchhiain result awm thei tur tihchian lawk a ni a, spot fixing-ah chuan result a nghawng thleng lo. Cricket-ah chuan bowler-in hun khawhral nan 'no ball' a vawm thei a, 'wide delivery' a nei thei bawk.

Thil thlen ṭum hi kum 2013 Indian Premier League kha a ni a, hemi kum vek hian thubuai hrang vangin Meiyappan leh Kundra te chu man an ni bawk.

Meiyappan buaina

Gurunath Meiyappan hi CSK team principal a nih bakah BCCI president hlui leh tuna ICC chariman N. Sreenivasan makpa a ni.

Meiyappan leh inthapna lam buaipuitu Vindu Dara Singh nen an inbiakna chu record a ni a, Mumbai Police-in an chhui chian hnuah Meiyappan hi an man. CSK team neitu India Cements chuan Meiyappan hi team hotu ni loin team enkawltu zinga hruaitu pakhat ve chauh an nih thu an puang nghal.

Raj Kundra buaina

Rajastan Royals neitu zinga mi Raj Kundra hi Bollywood star Shilpa Shetty pasal a ni. A ṭhianpa kaltlanga pawisa inchawinaa a tel avanga buaina nei a ni.

Lodha committee

IPL Season 3 buaina chhuichiang turin High Court judge Mukul Mudgal kaihhruai hnuaiah member pali awmna Mudgal Committee din a ni.

Mudgal committee zirchian­na chungchanga thutlukna siam turin January 22, 2015 khan Lodha committee din a ni. Committee-ah hian Chief Justice hlui RM Lodha bakah Supreme Court judge hlui Ashok Bhan leh R Raveendran te an awm.

Hremna chu

Lodha committee chuan July 14 khan thutlukna an puang a, IPL vawi hnih champion tawh Chennai Super Kings leh IPL hmasa ber champion Rajasthan Royals chu kum hnih atan a hrem a. Meiyappan leh Kundra te chu cricket-a inhnamhnawih thei lo tura hrem an ni.

IPL club hrem pahnih player-te chu club dang zawm turin an phalsak bawk.

A la tawp lo

IPL 2013 buaina erawh a la tawp mai dawn lo. Court hniam zawkah Sreesanth, Ankeet Chavan leh Ajit Chandila te thubuai ngaihtuah mek a ni a. Lodha committee-in a hremte hian an khin let chuan hun rei zawk a la awh thei bawk.

Lodha panel hi thla ruk chhung hun pek a ni a, hna pahnih tih loh an la nei. Buaina chungchanga inhnamhnawih IPL Chief Operating Officer Sundar Raman chungchangah thutlukna an la siam lo a, Board of Control for Cricket in India (BCCI) insiamṭhat dan tur rawtna an an la siam lo bawk. Committee hian an hun neih hi pawhsei an dil rin a ni.

IPL chu

Indian Premier League hi Twenty20 cricket tournament kum tina neih ṭhin a ni a, kum 2008 aṭanga ṭan tawh kha niin hlawhtling takin season riat hman zawh a ni. IPL hi India rama football inelna lian thar Indian Super League (ISL) hian kawng tam takah a entawn nasa hle.