Formula 1 Nakkumah Grand Prix 21 a awm dawn

Federation Inter­nationale de l'Automobile (FIA) chuan nakkuma Formula 1 calendar tur chu an ti chhuak ta a, kumin aiin Grand Prix pa­hnihin a tam zawk dawn.

Kuminah Grand Prix 19 a awm a, nakkumah erawh chuan 21 a awm dawn. Hei hi Formula intlansiak calendar-a intlansiak tam ber ṭum a ni dawn. Kum 2016 July thla khian a vawi khat nan Azerbaijan Grand Prix a awm dawn a, kumina sum lam harsatna vanga tlan theih loh Germany Grand Prix pawh tlan theih tawh tur a ruahman a ni.

Season thar hi 2016 April 3-ah Australia-ah neih ṭan a ni anga, intlansiak hnuhnung ber chu Abu Dhabi-ah November 27-ah tlan a ni ang. Thil danglam langsar tak pahnih a awm a, chungte chu March thlaa tlan ṭhin Malaysian GP chu September thlaah tlan a ni tawh dawn a; October thlaa tlan ṭhin Russia GP chu May thlaah an tlan tawh thung ang.