Russia-in an coach Capello an ban

Thawhlehni khan Russian Foot­ball Union (RFU) chuan an coach Fabio Capello an ban thu an puang.

Ram coach zinga hlawh tam ber Capello hian 2014 FIFA World Cup-ah Russia hi knockout stage a thlenpui lo satliah lo a, point an hmu lo. Chutichung chuan 2018 thleng a contract pawtsei sak a ni. Amaherawhchu result ṭha a neih chuang loh avangin RFU lamin hlawh sang taka chhawr reng tlakah Capello hi an ngai lo a, an ban ta a ni.

Russia rama football thuneitu sang RFU chuan, "Russian Football Union leh head coach Fabio Capello te chuan uluk taka kan inbiak hnuah thawhdunna tihtawp turin kan inrem," tiin thuchhuah an siam.

Italian manager hi ban a nih hma hian Russia media lam chuan a contract tih tawp a nih chuan RFU-in euro maktaduai 15 an pek a ṭul tur thu an tarlang tawh a, thla nga hlawh an pe thei lo niin an ziak bawk. Ban a nih tak hnu hian RFU hian zângnadawmna atana Capello an pek zat an tarlang lo.

Kum 69-a upa Capello hian Euro 2012 zawh khan Russia team hi a enkawl ṭan a, kum 12 hnua a vawi khat nan World Cup thlen pui mah se England coach hlui hian knockout round a thlen pui lo.

FIFA World Cup-a an mual­pho hnuah Russia hi 2016 Euro qualifier-ah an che ṭha chuang lo a, June 14 khan Austria lakah 1-0 in an tlawm. Russia hi Group G-ah vawi ruk khelhah point riat hmuin pathumna an ni a, hmahruaitu Austria hmuh chanve chauh an hmu pha a, an chunga awm Sweden point liin an pha lo bawk.

Russia coach thar tur puan a la ni lo a, CSKA Moscow coach Leonid Slutski chu Capello thlak tura rin a ni.