Athlete of the Year ni lo tur Justin Gatlin

International Asso­ciation of Athletics Federations (IAAF) chuan Justin Gatlin chu kuminah Athlete of the Year award dawng thei tura chhawp chhuah zingah a tel theih loh tur thu an puang.

IAAF-in Athlete of the Year award dawng thei tur tehna dan thar an siamah dam­dawi hman phal loha inhnamhnawihna lo nei tawh te chu telh an remtih loh avangin Gatlin a hming hi a lang thei dawn lo a ni.

Kum 2006 khan American sprinter Gatlin hian intihchakna damdawi a lo hman avangin kum li chhung tlan thei lo tura hrem a ni tawh. Gatlin hi kuminah a chetṭha mah se award a dawng pha lo ang.

American sprinter hian kar hmasa mai khan Diamond League-ah second 9.75 chhunga 100m tlan thlengin hnehna a lo chang tawh a, kuminah ani aia tlan chak an awm rih lo.

IAAF thu puangtu chuan, "IAAF Council Member zingah dan siam ṭhat duh an awm a, chung mite chuan infiammi zingah damdawi hman phal loh hmang an awm a nih chuan mimal chawimawina hlan loh nise an duh. He an duh dan hi Council chuan a pawmpui a ni. Hei hi mimal beihna ni loin 'athletic' hi thianghlim taka kalpui zel a nih theih nan a tih a ni," tiin a sawi.