Carl Froch-a'n boxing a chawlhsan

Super-middleweight champion vawi li lai lo ni tawh British boxer Carl Froch chuan boxing a chawlhsan ta.

Kum 38-a upa boxer hian vawi 35 a inhnekah vawi 33 hnehna changin a khingpuite vawi 24 lai a knockout a ni.

May, 2014-a WBA leh WBF title humhim tura George Groves a hneh hnua tumah la inhnek pui leh lo Froch chuan, "Tunah chuan ka ṭhat zia pholang turin engmah hmabak ka nei tawh lo, chu chu ka hnathawh ropui tak ten an tilangin ka hria. Boxing-a ka thil tawn ropui tak takte kha ka ngaihlu a, mahse tunah chuan ka chawlh a hun ve ta niah ka ngai," tiin a chawlh chhan a sawi.

Boxing a chawlhsan hnua boxing pundit anga Sky Sports a thawk tur Froch chuan, "Ka taksa lam hi chu inhnek turin a la hrisel tawk reng a, ka rilru lam a inpeih tawh lo thung. Inhnek chak zek zekna rilu ka put ang kha tunah chuan a liam tawh niin ka hria," tiin inhnek reng tura a rilru a inpeih tawh loh thu a sawi.

Feet 6 leh inches 1 a sang Froch chuan, "Duhthlan tur hi chu engtiklai pawhin a awm reng dawn a, chawlh ka tum hma chuan boxer zingah inhnek pui tur chu an awm reng dawn. Chawl tura thutlukna siam mai hi ka tan chuan a ṭha a, tuna ka chawlh loh chuan ka chawl lo reng mai dawn niin ka hria a ni," a ti.

Nottingham khawchhuak Froch chuan nikum June thla khan boxing chawlhsan a ngaihtuah hman thu sawiin May thlaa Wembley stadium-a mipui 80,000 hmaa Groves a hneh kha a inhnek hnuhnung ber a ni dawn ta a ni.

Kum 13 boxing a khelh chhungin Froch hian mi pahnih chiah a hneh lo. Kum 2010 khan Danish boxer Mikkel Kessler chu a hneh loh hmasa ber ni turin a hneh lo a; kum 2011 khan American boxer Andre Ward chu a hneh lo leh bawk. Mikel Kessler erawh kum 2013 khan a inhnek nawn pui leh a, hemi ṭum hi chuan chak zawkah ṭangin phuba a la.

December, 2008 khan a world title hmasa ber a la a, an khua Nottingham-ah WBC title la turin Canadian boxer Jean Pascal chu a hneh a ni.

Kessler laka a tlawm hnu kum 2010 vekah Arthur Abraham hnehin a WBC title a la let leh. Froch hian February thla khan a IBF title kawl lai chu a hlip a, hetia a title kawl lai a dah kham chhan hi amah chotu James DeGale hnek chu sum leh paia hlawkna tur awm lo nia a ngaih vang a nih thu a sawi.