MPL4-ah kalphung thar A sang paliin semifinal an khel dawn
Mizoram Football Association leh Zonet Cable TV tawngkawpin an buatsaih Mizoram Premier League Season 4 chu September 8, 2015 khian khelh ṭan a ni dawn a, season thar aṭang hian semifinal a awm tawh ang.
Nimin khan Mizoram State Olympic Association Office, Khatla-ah MPL4 atana thil pawimawh relin MPL Board an ṭhukhawm.
Hei le - Semifinal chu
MPL3-ah Aizawl FC leh Chanmari FC an chungnung fal a, Round 2 aṭanga Round 14 thlengin pakhatna leh pahnihna dinhmun an hauh a, final-ah Aizawl FC an chak.
Table mawnglamah Lunglei FC leh Reitlang FC ten point an hmuh theih meuh loh avangin Mizoram Police FC, Chanmari West FC, Dinthar FC leh Bethlehem VT FC ten champion beiseina leh tlak hlau si loin season an hmang tluan a, hei vang hian MPL3-ah game boruak sang hmuh tur a tlem hle.
MPL Board chuan Indian Super League entawnin MPL4 aṭangin semifinal awm turin an rel a, hei hi league hmuhnawm zawk nana tih a ni. ISL khelh zawh takah khan a sang pahnih Chennaiyin FC leh Goa ten final an lut zo lo a, league-a palinaa awm Kerala Blasters an champion daih.
MPL4-ah hian Round 14 khelh zawha a sang paliin semifinal an khel ang. Semifinal-ah hian pakhatna leh palina te an inkhel ang a, pahnihna leh pathumna an inkhel bawk ang. Semifinal hi ṭum hnih inkhelh (double legged) a ni ang a, final hi chu vawi khat (single leg) khelh tur a ni tawh ang.
Semi final-ah hian vawi hnih khelha team an inhnehtawk chuan penalty shoot out hmanga chak zawk zawn tur a ni ang. Final-ah hian minute 90 chhunga an inhnehtawk chuan extra time (15+15mins) pek belh an ni ang a, an la inhnehtawk zel chuan penalty shoot out hman tur a ni.
En Man - Rs 40
MPL4-ah inkhel en man tihsan hret a ni. League stage-ah en man Rs 40, Semi final en man Rs 50, Final en man Rs 100 a tih san a ni.
Inkhel en man aṭanga sum lut hi inkhel buaipuina senso paih a nih hnuah football club-in 70% an chang ang a, organiser-in 30% an chang thung ang.
Club thar
Reitlang FC President leh Secretary-in an club hming thak dilna an thehluh chu MPL Board chuan a pawm a, 'Zo United FC' tia thlak an dilna chu a pawm sak an ni.
Transfer Window
MPL club tana transfer hun chu vawiina tawp tura rel ni mah se nimina MPL Board ṭhukhawm chuan July 22, 2015 tlai dar 5:00 thleng a pawhsei.
Registraion tir tur hian player-te mahni ngei kala MFA Office, City Park-ah inziah luh tur a ni. AIFF-in transfer window a hawn chhungin inter state transfer kal tlangin player lakluh belh phal an ni ang. MPL Round 7 leh Round 8 inkarah player inziah luh/inpaih then hun hawn leh a ni ang.
MPL U17-ah kalphung thar
MPL Under 17 chu October 8, 2015-ah khelh tura ruahman a ni. MPL Under 17-ah hian a ṭum khatna atan team tinte hi vawi khat ṭheuh an inhkel kual chhuak (round robin league) vek ang a, an inkhelh kual chhuah hnua a sang pahnihin a tawpah final an khel ang.
MPL Under 17 atan hian team tinin kum 17 hnuai lam player an la khawm ang a, club danga registration neite pawh an khelh tawhna club-in an phalsak a, an kum a la dik chuan MPL Under 17 khelh phalsak an ni ang. Mizoramin youth football-a hmasawn theih nan MPL Under 17-ah hian registration hi phal zau deuh ṭhin a ni.
MPL3 Under 17-a team tir lo Lunglei FC chu MPL Board-in hremin Rs 10,000 a chawitir.