Chelsea keeper thar Begovic

Premier League cham­pion Chelsea chuan Stoke City aṭangin goalkeeper Asmir Begovic an la lut ta. Pound maktaduai 8 man Bosnia-Hercegovina international hian kum li cham turin Chelsea-ah hian contract thar a ziak a ni.

Kum 28-a upa Bego­vic hian kum khat dang cham turin Britannia Stadium-ah hian contract nei mah se Stamford Bridge lam pan hi a thlang ta zawk a ni.

Kum 2010-a Port­smouth aṭanga Stoke City zawmtu Begovic chuan, "Stoke-a ka hun hmante kha nuam ka ti em em a, mahse player ka nihna anga chona thar ka hmachhawn tur leh hma ka sawn zawk theihna tur hi ka hnar phal lo a ni," tiin Chelsea a zawm chhan a sawi.

Chelsea-in loan-a Radamel Falcao an lakluh hnua an player lakluh pahnihna Begovic chuan, "Chelsea ka zawm thei hi ka lawm takzet a, manager nen rei tak kan titi hnuin he team-ah hian player pawimawh tak ka nih theih ka inbeisei a ni. Ka team-mate thar te nen pre-season tour nei turin Nilainiah kan inhmuhkhawm ka beisei," tiin a team-mate thar te zawm thuai thuai a chak tawh thu a sawi.

Begovic hian Arsenal pantu Petr Cech-a jersey number hlui number 1 a ha ang a, Thibaut Courtois nen first choice keeper nih an inchuh dawn a ni.