Federer-a'n chawlh a la tum lo
Roger Federer-a'n Wimbledon 2015 final-a Novak Djokovic a hneh loh hnuah tennis chawlhsan a la tum loh thu leh cham-pion chu a thil tum leh châk a nih thu a sawi.
Grand Slam vawi 17 zet champion tawh Federer hian Wimbledon champion hnem ber record siam turin vawi khat champion bak a mamawh tawh lo a, mahse a thei rih lo; vawi sarihah a tang rih.
Kum 2012 Wimbledon final-a Andy Murray a hneh hnuah Grand Slam-ah a la champion leh lo a ni. Kum 33-a upa Federer hi champion thei ngat se chuan he tournament record a siam dawn bakah champion thei upa ber a nih dawn avangin a record a turu hle ang.
World number 2 Federer chuan, "Ka kum tam deuh tawh mah se lawmman dawn tluka nuam a la awm chuang lo. Tunah hian champion nomawi chawi hi ka la chak takzet a ni," tiin champion hnem tawh hle mah se champion belh zel ala duh thu a sawi.
Swiss thiampuipa Federer hian tennis a khelh hun chhungin single-ah champion nomawi 86 tehmeuh a la tawh a, ani aia chawi tam pahnih awmin vawi 109 chawi tawhtu Jimmy Connors leh 94 chawi tawhtu Ivan Lendl te chiah an ni.