United lak hual Lloris a inhliam

Tottenham goal­keeper Hugo Lloris chuan training-naah a banrek a ti na. Inhliam vangin French keeper hi Premier League match hmasa bera Manchester United nen August 8-a an inhmachhawn turah khel thei lo dinhmunah a ding.

Kum 28-a upa Lloris hian kum 2012 khan Lyon aṭangin White Hart Lane hi a pan a, tunah hian first-choice goalkeeper ni mek.

Season hman zawh takah khan Lloris hian Premier League match 35 lai a khel a, Spurs tan inelna hrang hrangah game 122 a khel tawh.

North London club Tottenham chuan thu­chhuah siamin, "Lloris hian fitness nei turin first team zingah training a nei chhunzawm zel dawn a, ṭha taka season bul a ṭan theih nan kan damdawi lam thiam ten uluk takin an enkawl mek a ni," an ti.

France number 1 goalkeeper hi tun hnaiah Manchester United nena sawi zawm a ni. Real Madrid-in United goalkeeper David de Gea lak luh an tum a, Real keeper Iker Casillas-a'n FC Porto a pan tawh avangin United-in an keeper hi an chan ngei dawn niin a lang.

Lloris hian nikum khan Spurs-ah kum nga atan a contract a pawtsei a, manto taka lakchhuah a ngaih dawn avangin tuna a inhliam hi United a panna kawnga harsatna siam thei a ni.

2014 World Cup-a France captain hian Tottenham hi a chhuah­san a nih chuan Spurs-in Michel Vorm chiah senior goalkeeper hman tlak an nei ang.