Leicester City manager thar Ranieri

Chelsea boss hlui Claudio Ranieri chuan kum thum chhung cham turin Leicester City-a zawm. Kum 63-a upa Ranieri hian June 30-a Leicester-in an ban tak Nigel Pearson chu a thlak dawn a ni.

Italian boss Ranieri hian kum 2004-a Stamford Bridge a chhuahsan hnuin England-ah manager hna a thawk leh tawh lo a, nikum lawk khan Greece manager a nihna aṭangin ban a ni.

Juventus, Roma leh Inter Milan te pawh lo enkawl tawhtu coach chuan, "Chelsea ka chhuah­san hnu khan khawvela league ṭha bera thawh leh hi ka chak hle ṭhin," a ti.

Ranieri hian kum 2000 khan Atletico Ma­drid chhuahsani Chelsea a zawm; Stamford Bridge-a kum li a cham chhungin Premier League pahnihna dinhmun vawi khat a hauhpui a, Champions League semifinal vawi khat leh FA Cup final vawi khat a khelh pui bawk.

Valencia, Parma leh Monaca te pawh lo enkawl tawhtu Ranieri hi kum 2014 World Cup zawhah khan Greece chuan an ram team enkawl turin an ruai a, an khelmuala Faroe Island an hneh loh avangin thla li hnu lekah ban lehnghal a ni.