Reitlang-in thawm an nei zel

Mizoram Premier League-a best keeper ni thei awmchhun Lalawm­puia'n Chanmari FC chhuah­sanin Reitlang FC a zawm. Mizoramin Santosh Trophy an champion-na kawnga player pawimawh AwP-a'n Chanmari FC a zawm avangin MPL4 hmel hmang a dang daih - champion thei zingah Rei­tlang chhiar tel ngei a ṭul ta.

Chanmari FC-in MPL1-ah goal 12 an chhuah a, MPL2-ah hma sawn hretin goal 9 chauh an chhuah a; MPL3-ah goal 10 an chhuah. Chanmari FC defensive record hi season thum chhungin a ṭha lawr lak a, keeper AwP-a pawimawh zia a lang chiang hle.

Hetihlai hian AwP-a club thar hian MPL3-ah goal 26 ngawt an chhuah a; MPL4 khel leh tura relegation playoff an khelh chhan kha keeper neih ṭhat loh vang a ni. Reitlang-in Mizoram keeper ṭha bera chhal theih AwP-a an lak luh takah chuan tlar hnung a phui sawt ang.

Reitlang hian keeper AwP-a an lak rual hian a unaupa FC Kulikawn leh Luangmual FC tan pawha lo khel tawh Laldinpuia an la tel bawk. Tlar hmaah MPL2-a a captain-na hnuaia Luangmual FC final hruai thlengtu MC Malsawmzuala an lut bawk. Sawmtea hi MPL3-ah Mizoram Police tan khelin goal nga a khung.

MPL4-ah Reitlang champion ngei an tum a, coach/player turin Samson Ramengmawia an la lut a; Chanmari FC captain Ricky Lal­lawm­awma, Dinthar aṭangin Lalnuntluanga, Lalrinzuala leh Vanlalchhanhima, BVT defender Vanlalruata te bakah local football-a tawnrhiat nei ṭha tak tak an lak luh avangin MPL3 pasarihna Reitlang hi dah hniam theih an ni lo.