Rodgers-a'n Sterling a haw lo

Liverpool manager Brendan Rodgers chuan an rawlthar chhuan­vawr Raheem Sterling-a'n Man­chester city zawm san dawn mah se huatna engmah a neih loh thu a sawi.

Sterling chher liantu Rodgers chuan, "Tun hnaiah thuthar mak pui pui a awm reng a, media

ṭhenkhatah chuan Sterling nen hian in mil lo anga ziah kan ni. Mahse ka sawi duh chu Sterling nen hian kan inkar boruak a pangngai reng a, buaina kan nei lo," a ti.

English winger Sterling hian nimin khan Manchester City-ah medi­cal neiin contract ziak fel hman tura beisei a ni.

Rodgers chuan Ster­ling-a hmunruak hnawh­khattu tur chungchang sawiin German club Hoffenheim aṭanga an lak­luh Brazil forward Roberto Firmino chung­chang a sawi lang a, Rodgers chuan, "Roberto Firmino hi khawvela player ṭha ber pawl a ni. A la khelh ngai lohna Premier League-ah a rawn khel dawn a, a nihna ang taka khelchhuak tur chuan hun a duh mai thei. Mahse, player-a kan duh ang zawng zawng hi chu amahah hian a awm vek a, player thawkrim tak a ni," tiin a player thar chu a fak hle.

Player dang lakluh belh an tum leh tum loh chungchangah Rodgers chuan, "Chanchinthar lakhawm­tute hmaa kan transfer kalpui dan puanzar chiam hi ka duh tawh lo. Season hma­sa khan transfer chungchang ka sawi nasa a, tun kumah chuan sawi lan loh hram hram ka tum. Kan hmalakna reng reng chu club chhungah a ruk thei ang ber zelin kan ti ang. Kan tum ber chu season hmasa aia team ṭha zawk leh chak zawk din hi a ni," a ti.