Aizawl FC tan Veron a inlan dawn

Aizawl FC-in vawiin tlai dar 2:00 hian Khuman Lampak Main Stadium-ah Trau an tlawh dawn a, player thar Argentine midfielder Matias Veron a inlan nghal dawn.

Mizo club hian tun season I League match sarih an khelh tawhah vawi khat chiah an la chak lo a, an tlawmna hmun erawh vawiina an inkhelhna tur hi a ni a, Manipur club pakhat zawk Neroca an hneh lo. Aizawl FC coach Standly Rosario chuan, "Tun season-ah vawi khat chiah chak loh kan la nei a, chutiang bawkin vawi khat tho kan chak. Draw vawi nga kan nei tawh a, heng zinga paliah tal hi chuan chak kan phu," tiin an phu ang result an neih loh thu a sawi.

Player thar chungchang sawi zuiin Standly chuan, "Veron hian kan bulah ṭum li traning a nei tawh a, talent ṭha tak a nei. Chutihrualin team thara khel tur a ni a, uluk takin a khelh dan chik a ṭul ang. Kan tan chuan vawiin inkhel hi a pawimawh em em a, hnehna kan chang thei a nih chuan kan match hmabakah pawh inrintawkna kan nei sawt ang," tiin Vanglaini a hrilh.

Mizo club hian foreigner paruk an nei tawh a, Trau lakah hian hrem vangin defender Joseph Adjei a inlan thei dawn lo. Coach Standly chuan foreigner dang panga Alfred Jaryan, Ricardo Veron, Richard Kasagga, Abdoulaye Kanoute leh Justice Morgan aṭangin player paliin inkhel bul an ṭan tur thu a sawi lawk. Aizawl FC khingpui tur Trau hian December 12-a East Bengal laka an tlawm hnuah chak lo nei tawh loin match hnuhnung panga aṭangin point 11 an hlawh chhuak a, match hnuhnung pathumah an chak vek bawk.