Arsenal an chak chiang

Premier League champion nih ngei tumin Arsenal an che chhuak - Mikel Arteta naute hian kawng tinrenga inkhel thunun chungin Nottingham Forest chu 3-0 in an sawp.

Gunner tan hian midfielder thar Martin Zubimendi chuan goal hnih a khung a, striker thar Viktor Gyokeres chuan goal khat a khung bawk. Swedish striker siamsaktu chu nipui bazar laia an lak thar tho Eberechi Eze a ni a, Arsenal player tharte an langsar hle.

Inrinni zan Emirates Stadium-a inkhelah, mikhual team lamin corner an veng uluk hle a, mahse corner aṭanga ball an tauh chhuah hi vengtu nei lo Zubimendi chuan mawi zetin a lo hlap lut pawp.

Arteta-a'n hliam vangin Bukayo Saka, Kai Havertz, William Saliba leh Gabriel Jesus te a chawr thei lo a, minute 18-na lekah captain Martin Odegaard chu hliam vangin lak chhuah a ngai bawk, buaina erawh an tawh phah lo.

England international forward Eze-a'n mual sirah a hna a tlin, ball kang lai chu nghak miah loin a cross nghal a, awmna tur hmun dika lo changtu Gyokeres-a'n a lo khung chat - EPL match li a khelh aṭangin goal thum a khung der!

Forest manager thar Ange Postecoglou leh a naute an vannei tawk lo a, vannei taka goal khung theihna remchang an hmuhah bar an tih per. Arsenal erawh an che fuh, substitute Leandro Trossard siamsak chu Zubimendi bawkin a tauh lut.

Arsenal an chak a, an player thar ho khelh dan avangin an lawm zual ang. Saka awm loh karah Noni Madueke a rintlak a, winger Gabriel Martinelli tan Eze nek chhuah a huphurhawm ang - Saliba awm loh karah kum 21 mi Cristhian Mosquera a nghet ṭha viau bawk.

Season tir chauh a la nih avangin Arsenal dinhmun tur sawi huai ngam erawh a la ni lo - Champions League an khel a nga, chumi hnuah Manchester City an hmachhawn zui dawn, a hautak chho dawn hle a ni.