A tawp khar dik a ngai - Maresca

Chelsea coach Enzo Maresca chuan Brentford lakah hnehna chan phu zawkah a inngai a, a tawp khar dan dik erawh an zir a ngai tih a pawm bawk a ni.

Inrinni zan Premier League inkhelah Chelsea leh Brentford te 2-2 in an inhnehtawk. Bees tana Kevin Schade goal khung chu Cole Palmer leh Moises Caicedo te hmangin lehthal mah se, hun tawp dawnah Fábio Carvalho chuan a sut ve leh thung.

Blues coach Enzo Maresca chuan, "Ka hmuh danah chuan hnehna chan phu khawpin kan khel ṭha. Second half-ah goal hnih kan khung a, khami bakah khan Palmer leh Pedro ten khan khung belh theihna remchang an nei bawk.

"Khel ṭha viau mah ila a tawpah point thum erawh kan hmu lo, inkhel a zawh hma chuan inthlahdah theih a ni lo a, a hmawr bawk dan dik kan zir chhuah phah ngei pawh ka beisei," tiin a sawi.

Italian manager Maresca enkawl Chelsea hian season ṭan niah Crystal Palace chu goal awm loin an lo inhnehtawk pui tawh bawk a, chumi hnuah West Ham leh Fulham te hneh mah se tunah point an hloh leh a, point an hloh fo chuan champion a harsa ang.

Player lut leh chhuak an ngah a, hliam vangin ṭhenkhat chuan ngai an la awh lo bawk. A bik takin tlarhnung leh midfield a la siksawi nasa a, an ṭhat dan ber an la hre fuh rih lo niin a lang, hun an la mamawh hret.

Chelsea hian tun kar hian Champions League-ah Bayern Munich an tum dawn a, chumi hnuah Manchester United chu Old Trafford-ah an lenchilh zui dawn avangin an hna a hautak dawn hle.