Spurs an chak ve leh ta

Bournemouth laka rin loh taka an tlawm hnuin Tottenham Hotspur an insiamrem lehnghal a, Inrinni zan khan an mikhualna ramah West Ham chu 3-0 ngawtin an sawp.

Spurs hian first half-ah goal khung lo mah se, second half ṭan aṭanga minute hnihnaah Pape Matar Sarr hmangin goal hmahruai an khung a, an vanneihna belhchhahin a awm zui.

Minute 54-naah West Ham midfielder Tomás Soucek hnawhchhuah a ni a, Spurs tan Lucas Bergvall leh Micky van de Ven ten an khung belh zui - mualneitu Hammers-in a chhanletna tur an nei lo a, Spurs an chak.

West Ham hian match sarih zet chu a zawnin mahni mualah hnehna an chang zo ta lo a, London Stadium-a an insawn hnua an khelmuala an chak loh rei ber a ni.

Tottenham hian Thawhlehni zanah Champions League match khelh tur an nei lehnghal dawn a, Villarreal an mikhual dawn - UCL match khelh hmaa chak hian player-te phurna a pe ang.