St. James' Park-a lawmna thlentu Woltemade

Newcastle United chanchina player manto Nick Woltemade-a'n Inrinni zanah bul a ṭan a, Wolverhampton Wanderers lakah goal awmchhun a khung. German striker Woltemade-a'n khelmual a chhuahsan laiin Magpies ṭantuten 'standing ovation' an pe a, match khat lekah ama pual hla a nei nghal. 'Woltemade, Woltemade, ole, ole, ole' tih chu St James' Park-a Newcastle ṭantute zai rual dan a ni.

Magpies-in season liam taa an striker pawimawh Alexander Isak chu Liverpool lakah £125mtd-in an chan a, Eddie Howe-a'n Isak thlak nan Woltemade (£69mtd) leh Yoane Wissa (£55mtd) te an lalut a, DR Congo international erawh hliam vangin October thla chawhnu lamah a inlan thei chauh ang.

Wolves an hmachhawn ṭumin Woltemade chu en bik ni a, 6ft 6in-a sang a nih avangin a langsar viau bawk. Minute 29-naah Jacob Murphy cross chu Woltemade hian a sanna hmang ṭangkaiin a tauh lut a, inkhela goal awmchhun a ni. Newcastle tan German striker goal a hlu a, tun season-a an chakna hmasa ber a nih bakah Isak thlak thei tur striker an hmuah an ngai bawk.

Inkhelh banah Newcastle manager Eddie Howe chuan, "A san dan en chuan no. 9 turah a ngaih theih a, mahse chutiang player chu a ni chiah lo. A khel kha en chiang ula, tlarhmaah ball pass a ngah a, tlarhnung a ṭhiat a thiam hle," tiin chakna goal khungtu Woltemade a fak a, club legend Shay Given pawhin a khelh dan chu no. 10 a ang mah zawk thu a sawi bawk.