MPL12-ah record thar a awm dawn em?

GIG Motors MPL12-ah Aizawl FC forward Zomuansanga'n goal riat a khung tawh a, Khawbel tlangval hnuaiah hian Saikhamakawn striker Suanngaihmuana (6 goals) leh MLS FC winger M. Lalpektluanga (5 goals) te an awm.

Mizoram chhunga inelna sang ber MPL hi season 11 khelh a ni tawh a, season khata goal khung tam berin goal 13 a khung. MPL4-ah khan F. Lalrinpuia'n Aizawl FC tan khelin semifinal leh final a khel lo chungin goal 13 a khung a, hei hi tun thlenga record dinglai a ni.

MPL8-ah Chhinga Veng FC striker MC Malsawmzuala'n goal 12 a rawn khung a, Valpuia record a khum pha lo. Season liam ta pawh khan Aizawl FC winger Lalbiakdika'n league round-ah goal 12 a khung a, mah se Champhai Zotlang tlangval hian knockout stage chinah goal a khung belh loh avangin record a khum ta chuang lo.

Tun season-ah Aizawl FC forward Zomuana hian hattrick a siam tawh bakah match hnuhnung paliah goal a khung vek a, record siam turin a dinhmun ṭha mah se record khum tak erawh a awlsam kher lo ang. I Day Football-a AFC rinrawl zawk C. Lalhriatpuia a dam chho ang a, Zomuana tan minute neih tam tur pawhin thawhrim leh chetṭhat a ṭul dawn. Chuthrualin Khawbel tlangval hian record khum turin goal ruk chauh a khung a ngai tawh thung.