Real Madrid 'star' chu Kylian Mbappe

Kylian Mbappe chuan Real Madrid-ah a changtupa ber a ni dawn tih khelmualah a pholan chhunzawm zel a, Inrinni zan La Liga inkhelah goal a khung leh ta - tun season-ah league match li khelin goal li a khung ta chiah.

Real Madrid hian an mikhualna ramah Real Sociedad chu 2-1 in an hneh a, Mbappe-a'n goal a khung hnuah Dean Huijsen chu hnawhchhuah ni mah se, Arda Guler chuan Real tan goal a khung belh.

Sociedad hian Mikel Oyarzabal-a penalty hmangin goal khat an khung ve a, mahse, hun tawp thlenga goal dang an khung tawh loh avangin player 10-a khel Real lakah an tlawm.

Real Madrid hi match li an khelh tawhah an la chak vek a, an ṭhenawm club Atlético Madrid nen an thawnthu a inang rih lo hle. Atletico hian Villarreal lakah 2-0 in hnehna an chang ve a, tun season-a an vawi khat chakna a ni!

Real an pawr

Sociedad khelmualah goal khung turin Real hian hun an mamawh rei lo. Minute 12-na lekah Sociedad winger Mikel Goti chuan an lamah ball a pe phei a, defender hoin ball kal dan tur an chhutsual.

Mbappe chuan chak takin ball hi a um lut zui a, harsatna nei loin goal-ah a chantir a, 1-0 in hma an hruai. Mahse, Real hian an hlim hnu lawkah lawm lohna tur an tawng.

Minute 32-naah Spain forward Oyarzabal chuan ball ṭha bik hmuin, chak takin a um lut a, Huijsen-a'n tihdan ṭha bera a hriat hmangin a titlu a, hnawhchhuah loh chi a ni lo!

Player 10-in Real an khel zui a, an talbuai phah lo thung. Minute 44-naah Mbappe bawk a inlar a, French forward hian Sociedad tlarhnung a chin pharh hnuah Guler tan a siamsak a, Turkish midfielder hian an goal hnihna a khung.

Hlauhthawnna

Real-in player 10 ni chungin, 2-0 in hma an hruai a, mahse, a kim lo zawk an nih miau avangin an hlauthawng a, mualneitu Sociedad-in point hlawhchhuah theih an inbeisei.

Sociedad tan hian second half ṭan aṭanga minute lina lekah Pablo Marín chuan uiawm takin a hlah a, post a per! Mahse, mualneitu team hi an vanduai reng bik lo.

Ander Barrenetxea-a cross chuan Dani Carvajal-a kut perin, Real captain hian penalty a chawi a, Oyarzabal chuan harsatna nei loin goal-ah a chantir a, 2-1 a ni.

Real an hlauthawng a, Sociedad player hlui, Real boss Xabi Alonso-a'n minute 80 hnu lamah Trent Alexander-Arnold leh David Alaba te a la luhtir thei a, a tawpah Real an chak.

Atletico chak

Diego Simeone-a enkawl Atletico an chak ve ta - Inrinni zan an inlan hmain league match thum an khelhah an la chak miah lo a, vawi khat tlawmin, vawi hnih draw an nei a, result a ropui lo hle.

Mahse, Atletico an insiamṭha ta nge nge a, an mikhual Villarreal chu 2-0 in an hneh. Madrid khaw club tan Pablo Barrios chuan minute kuana lekah goal hmahruai a khung a, minute 52-naah Nicolas Gonzalez chuan a belhchhah bawk.

Atletico-in hnehna an chang ve ta a, an thaw huai ang! Spanish club hian Nilaini zan dar 12:30-ah Liverpool lenchilhin, tun season Champions League-a an match hmasa ber an khel dawn a, Anfield len hmaa chak hi result duhthusam a ni ang.

Hetihlai hian champion lai Barcelona erawh nizan dar 12:30 khan an inlan ve chauh a, Valencia mikhualin, he thu buatsaih a nih lai hian an result kan hre hman lo.