Juve lakah Inter Milan chak lo

Serie A team ṭha pahnih inhmachhawnah Juventus chuan an mikhual Inter Milan chu 4-3 in an hneh a, Old Lady hian team lian dangte elphak turin an ṭha tawk a ni tih an lantir mek zel.

Inrinni zan Allianz Stadium-a inkhelah, mualneitu lam tan Lloyd Kelly, Kenan Yildiz, Khephren Thuram leh Vasilije Adzic ten goal khat ṭheuh an khung a, mikhual tan Hakan Calhanoglu-a'n goal hnih khungin Marcus Thuram chuan goal khat a khung ve bawk.

Team pahnih an inkhel tawk hle a, point an insem mai dawn ni pawhin a lang hman. Mahse, Juventus tan substitute Vasilije Adzic chuan injury time an khelh laiin hla deuh tak aṭangin chakna goal a khung a, mikhual tan chhanletna hun a awm tawh lo.

Inter Milan coach Cristian Chivu chuan, "Chak lo mah ila kan khelh danah khan lawmna tur tam tak a awm, a chang chuan hun tawp dawn lama chetsual ve theih a ni a, tun ṭumah pawh khan kan vanduaina turin Juve khan an beisei ngam loh tur khawpa ṭhain goal an khung," a ti.

Serie A match hnih an khelh tawhah Inter hi vawi hnih an tlawm der a, an insiamṭhat vat loh chuan a chunga awm ten an kalsan hla thuai dawn - Juventus erawh an la chak vek thung a, champion lai Napoli nen point kua ve ve an hmu.

Inrinni zan inkhel dangah Napoli chuan Fiorentina chu 3-1 in an luhchhuah bawk - Italian champion tan hian striker thar Rasmus Hojlund chuan goal a khung nghal a, midfielder that Kevin de Bruyne-a'n penaltu a chhuih luh bakah Sam Beukema chuan a khung bawk.

Napoli coach Antonio Conte chuan, "Inelna hautak hmachhawn turin kan rilru leh taksa a inpeih tih chu a takin kan lantir. David De Gea kha a che ṭha hle a, ni lo se la chuan goal tam zawk pawh kan khung ngei ka ring.

"Hojlund khelh dan khan min ti lawm, kum 22 mi chauh niin Manchester United aṭangin kan la thei a, nikuma Scott McTominay kan lak ang bawk khan vanneihna pawh a rawn ken tel ngei ka beisei," a ti.

Italian manager Conte hian season hmasa khan Naples club hi a champion pui thei a, tun season-ah chuan Italian champion chauh ni loin European football inelna sangah pawh beisei an nei ngam tawh ang.