Bayern an chak nuamsa

Bundesliga-ah Bayern Munich an kal zel - match thum an khelh tawha an vawi thum chakna ni turin Hamburger SV chu 5-0 in an sawp a, Harry Kane chuan goal hnih a khung.

Bayern hian first half chhungin goal li an khung hman a, Serge Gnabry, Aleksandar Pavlovic, Harry Kane (penalty) leh Luis Diaz ten an khung - Kane hian second half-ah an goal ngana a khung zui a, Bundesliga kai thar Hamburg tan champion lai an ṭha lutuk hret.

Kum 32 mi Kane hi tun season league match thum an khelhah a inlan vek a, goal nga a khung leh der tawh - assist vawi thum a nei bawk. Club World Cup-te nen chhiar tel chuan tun season-ah inelna hrang hrangah match 10 khelin goal 11 a khung a, assist vawi li a nei tawh.

Hetihlai hian nipui transfer-a Liverpool chhuahsana Bayern zawmtu Luis Diaz pawhin goal a khung chhunzawm ve zel a, league match thumah goal thum a khung tawh - inelna hrang hrangah match nga khelin goal li a khung ta a, assist vawi hnih a nei bawk.

Bayern manager Vincent Kompany chuan second half ṭantirhah Gnabry la chhuakin, Chelsea aṭanga loan-a an hawh striker Nicolas Jackson chu a luhtir a, mahse, German club tana a match hmasa berah Jackson hian goal a khung thei lo.