Sterling manah Liverpool leh City an inrem

Manchester City-in vawi hnih lai Raheem Sterling lak­luh tuma Liverpool an dawr hlawh­chham hnuin a vawi thum naah an hlawhchham tawh lo. City leh Liverpool hi pound maktaduai 49-in an inrem a ni.

English winger lakluh tum hian Arab sum ring Manchester City-in Liverpool an vawi khat dawr naah pound maktaduai 25 an thehchhuak zet a, an hlawhtling lo chiang hle. A vawi hnih nan pound maktaduai 35 nen Reds hi an dawr nawn leh a, Liverpool-in an player manah hian pound mak­taduai 50 lai an chhiar avangin City an hlawhtling thei lo.

Manchester City-in Liver­pool laka nuar mek Sterling hi lakluh ngei an duh si a, a vawi thum nan pound maktaduai 49-in Liverpool an dawr nawn leh a, Merseyside club hian an hnar nawn tawh lo. British player zinga man to ber chu Gareth Bale a ni a, kum 2013 khan Real Madrid-in khawvel transfer-a player man to ber ni turin pound maktaduai 85.3-in Tottenham aṭangin an lalut. Bale tih loha British player man to ber chu Raheem Sterling hi a ni ta.

Sterling-a man chungchangah club pahnih inrem tawh mah se Sterling hi City player a la ni chiang lo. A contract chung­changah City aiawh te nen an la indawr ve leh phawt anga, medical neih a la hmabak bawk.

Inrinni khan Sterling hi Liverpool squad Thailand, Aus­tralia leh Malaysia-a zin tur zingah telh ni mah se City leh Reds hi an indawr fel takah chuan squad aṭangin a hming paih a ni. English winger hi May thla khan Liverpool hian kar khata £100,000 hlawh turin contract thar an lo zawrh tawh a, a hnar. Season thar atana club-in training an neih hnuah Sterling-a'n Liverpool chhuahsan a duh tih a chetzia hmangin a lan tir chhunzawm a, pre season tour-a tel loh a dil bakah ni hnih chu a damloh chhuanlamin training a zawm lo.

Kum 20-a upa England inter­national chet dan hi Liverpool legend Jamie Carragher chuan na takin a lo dem tawh a, Liver­pool tan an hnena khel duh lo player chu hralh mai ṭha a tih thu a sawi. Liverpool captain ropui ṭhin Steven Gerrard pawh a ṭawngchhuak a, a vanglai hun zawng zawng Liverpool tana hmang zo tu Gerrard hian Sterling-a chet dan chu professional lo tiin a lo sawisel tawh a ni.

Tun hnaia Soccerex-in an zirchiannaah chuan Sterling hi Europe-a rawlthar player hlu ber niin Paris St-Germain defender Marquinhos leh Manchester United player thar Dutch winger Memphis Depay te aia hlu zawkah ngaih a ni.

Hetihlai hian Liverpool-in Sterling an hralh vanga lo hau­­sa ve sawt tur chu Queen Park Rangers an ni. Liverpool hian kum 2010 khan £500,000-in QPR rawlthar kum 15 mi Sterling hi Anfield-ah an seng­lut a, an inremna ang chuan Liver­pool-in Sterling hi club dangah an hralh a nih chuan QPR in chan an nei ve ang tih a ni. Cham­pionship club QPR hian Sterling man aṭang hian pound maktaduai 9 an lo chang ve anga, Liverpool-in Sterling man aṭanga an hmuhchhuah tur zat chu pound maktaduai 40 a ni ang.