Fenerbahce player thar tur RVP

Manchester United striker Robin van Persie chuan Pathianni khan Turkey khawpui Istanbul a thleng a, kar hmasa lawka United winger Nani la luttu Fenerbahce nen inbiakna an nei dawn a ni.

Kum 31-a upa United striker hian Istanbul airport-ah hmuaktu fans a nei ṭhahnem hle a, amah hmuaktu te zingah Dutch striker chuan, "Club ropui leh lian takah ka rawn kal a, ka tan chuan hei hi chawimawina ropui tak a ni," a ti.

Netherlands tan vawi 98-a inlana goal 49 khungtu Van Perise hian kum 2012 khan Arsenal aṭangin pound maktaduai 24-in United hi a pan a, Old Trafford-a a season hmasa berah goal 26 khungin Premier League-ah a team thar hi a champion pui nghal. Mahse, season hman zawh takah khan hliamin Van Persie a tlakbuak a, goal 10 chiah a khung.

Kum 2004-a pound maktaduai 2.75-a Feyenoord aṭanga Arsenal pantu Van Persie hian Gunners tan vawi 278 a inlanah goal 132 a khung. United a pan hnu paw'n a hlawhtling chhunzawm zel a, vawi 105 a inlanah goal 58 a khung.

2011-12 season a PFA Player of the Year Van Persie a chhuah dawn takah chuan United in striker chhawr theih pahnih chiah an nei dawn tihna a ni. Captain Wayne Rooney leh James Wilson te chu chhawr theih tura damchiang an ni a, Javier Hernandez chu hliam vangin a chawl mek bawk.