Leander Paes leh Hingis an ropui

Inrinni zan khan Martina Hingis leh India nula Sania Mirza te ṭang kawp chu Wimbledon Hmeichhe double-ah an champion a, Pathianni zan khan mixed double-ah India tlangval Leander Paes nena ṭangkawpin an champion leh bawk.

Kum 34-a upa Hingis leh kum 42-a upa Paes te ṭang dun hian Austrian star Alexander Peya leh Hungary star Timea Babos te ṭang dun chu Centre Court-ah minute 40 chhung lekin 6-1, 6-1 in an hneh a ni.

Mixed double vawi li champion tawh Paes chuan, "Kum tam deuh tawh mah se hnehna chan hi chu a lawmawm dan a pangngai reng. Hingis kha Inrinniah a inkhelh avangin a chau hle ang tih ka ring. Amaherawhchu, final-ah khan ṭha takin a rawn khel chhuak leh thei tho a, ka lawm takzet a ni," a ti.

Kum 15 chauha upa a nih laiin Hingis leh Helena Sukova te ṭang kawp chu Wimbledon double-ah an lo champion tawh. Hingis hi khawvelin beiseina sang tak nen thlir mah se kum 22 a nihin a kerek hliam vangin tennis a chawlhsan a, kum 2006 khan WTA Tour-ah lo kir lehin 2007 November thla han a vawi hnih nan a chawl leh. Tun hnaiah rawn kir lehin kuminah mixed double leh double-ah a champion kawp ta a ni.